Túrkistan oblysynda 24 sorǵy qondyrǵysy zańsyz ornatylǵan
ASTANA. KAZINFORM — Túrkistan oblysy Shardara aýdanynyń Jaýshyqum sýarý alqabynan tirkelmegen 24 sorǵy qondyrǵysy anyqtaldy, dep habarlaıdy Sý resýrstary jáne ırrıgatsııa mınıstrligi.
Memleket basshysynyń tapsyrmasy boıynsha Sý resýrstary jáne ırrıgatsııa mınıstrligi sýdyń «kóleńkeli» naryǵymen kúres júrgizip jatyr. Tekserý barysynda Aral-Syrdarııa basseındik ınspektsııasynyń mamandary Túrkistan oblysy Shardara aýdanynyń Jaýshyqum sýarý alqabynan tirkelmegen 24 sorǵy qondyrǵysyn anyqtady. Tekserý nátıjeleri tıisti sharalar qabyldaý úshin jergilikti atqarýshy organdarǵa joldandy. Sondaı-aq jergilikti ákimdikke anyqtalǵan zańbuzýshylyqtardy joıý boıynsha usynystar berildi.
Eske sala ketsek, 2025 jyldyń birinshi toqsanynda Sý resýrstary jáne ırrıgatsııa mınıstrliginiń basseındik ınspektsııalary 20 tekserý júrgizip, nátıjesinde 26 zań buzýshylyq anyqtalyp, 10 uıǵarym shyǵarylyp, 13,3 mln teńge somasyna 133 ákimshilik aıyppul salyndy.
2024 jyly basseındik ınspektsııalar 439 tekserý júrgizip, onyń barysynda 1 855 zań buzýshylyq anyqtalyp, 429 uıǵarym shyǵaryldy. Jalpy somasy 48,4 mln teńgege 582 ákimshilik aıyppul salyndy.
— 10 maýsymnan bastap jańa Sý kodeksi kúshine enedi. Qujatqa sáıkes, basseındik ınspektsııalar qadaǵalaý jáne jedel áreket etý sharalaryn qabyldaý quqyǵyna ıe bolady. Sonymen qatar Sý kodeksine sáıkes, Ákimshilik kodekske de ózgerister engizilip, sý zańnamasyn buzǵandarǵa jazalaý sharalary kúsheıtiledi, — dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin sý resýrstarynyń ulttyq aqparattyq júıesiniń tórt modýli pılottyq rejımde iske qosylǵany anyqtaldy.