Túrkistan oblysynda 213 kásipker azyq-túlik baǵasyn negizsiz kótergen

TÚRKІSTAN. KAZINFORM - Túrkistan oblysynda azyq-túlik baǵacynyń turaqtylyǵy basty nazarda. QR «Saýda qyzmetin retteý týraly» zańynyń 9-babyna sáıkes, satýshylar áleýmettik mańyzy bar azyq-túlik baǵasyna 15  paıyzdan artyq ústemeaqy qospaýy tıis.

Saýda jáne tutynýshylardyń quqyqtaryn qorǵaý departamenti tarapynan áleýmettik mańyzy bar azyq-túlik baǵasyn negizsiz kótergen 213 kásipkerlik sýbektisine ákimshilik shara kórilip, zań buzýshylyqtar joıyldy.

Qazirgi ýaqytta ÁMAT tizimine 19 taýar kiredi. Olardyń qatarynda birinshi sortty bıdaı uny, birinshi sortty unnan jasalǵan bıdaı nany (pishindi), rojkı (ólshenip salynatyn), qaraqumyq jarmasy (dán, ólshenip salynatyn), tazartylǵan kúrish (domalaq dándi, ólshenip salynatyn), kartop, ashanalyq sábiz, basty pııaz, aq qaýdandy qyryqqabat, aq qant – qumsheker, kúnbaǵys maıy, sıyr eti (súıekti jaýyryn – tós bóligi), taýyq eti (san súıek jáne irgeles jumsaq eti bar san jilik), maılylyǵy 2,5% bolatyn jumsaq qaptamadaǵy pasterlengen sút pen aıran, sary maı (tuzdalmaǵan, maılylyǵy keminde 72,5%, tolyqtyrǵyshtar jáne ósimdik maılary joq), taýyq jumyrtqasy (І sanatty), as tuzy («Ekstra»-dan basqa), súzbe bar.

«Jalpy Túrkistan oblysynda áleýmettik mańyzy bar azyq-túlik taýarlarynyń baǵasy turaqty jáne baǵasyn negizsiz ósirmeý boıynsha jumystar kúndelikti baqylaýda. Sonymen qatar tıisti sharalar óz kezeńimen jalǵasady», - delingen Túrkistan oblysy ákiminiń baspasóz qyzmeti taratqan aqparatta.