Túrkistan oblysynda 200 myń gektarǵa jýyq jaıylym memleket menshigine qaıtaryldy
TÚRKІSTAN. KAZINFORM — Óńirde júrgizilgen tekserý nátıjesinde 187,3 myń gektar jaıylymdyq jerde mal basy tirkelmegeni anyqtaldy. Bul týraly Túrkistan oblystyq jer qatynastary basqarmasynyń basshysy Erǵalı Tilegen brıfıngte málimdedi.
Búginde oblystyń jalpy jer qory 11 mln 610,3 myń gektar. Onyń ishinde jaıylymdyq jerlerdiń kólemi 8 mln 822,7 myń gektarǵa jetedi.
Basqarma basshysynyń aıtýynsha, jyl basynda oblysta jaıylym tapshylyǵy 531,1 myń gektar bolǵan.
— Óńirdegi ózekti máselelerdiń biri — qoǵamdyq jaıylym tapshylyǵy. Memleket menshigine qaıtarylǵan jaıylymdardyń 165,6 myń gektary aýyldyq okrýg ákimdikterine qoǵamdyq jaıylym úshin turaqty paıdalanýǵa bekitildi. Nátıjesinde eldimekenderdegi qoǵamdyq jaıylym tapshylyǵy 365,5 myń gektarǵa deıin tómendedi. Qazirgi ýaqytta aýdan, qala ákimdikteri tarapynan tapshylyqty odan ári azaıtý jumystary júrgizilip jatyr. Birinshi kezekte orman qory men erekshe qorǵalatyn tabıǵı aýmaqtardaǵy jerlerdi paıdalaný boıynsha memorandýmdar jasasyp, turǵyndardyń mal jaıýyna múmkindik berýdi kózdep otyrmyz, — dedi Erǵalı Tilegen.
Sonymen qatar arnaıy jumys toby júrgizgen tekserý nátıjesinde aýdan, qala aýmaǵyndaǵy 1494 jer paıdalanýshyǵa tıesili 187,3 myń gektar jaıylymda mal basy tirkelmegeni anyqtalǵan. Osyǵan baılanysty atalǵan jerlerdi memleket menshigine qaıtarý jospary bekitilgen.
— Jyl basynan beri aýdan, qala ákimdikteri tarapynan 192,4 myń gektar jaıylym jer memleket menshigine qaıtaryldy. Aldaǵy ýaqytta qaıtarylǵan jerlerdi adal jer paıdalanýshylarǵa konkýrs arqyly qaıta berý josparlanyp otyr, — dedi Erǵalı Tilegen.
Óńirde aýyl sharýashylyǵy maqsatyndaǵy jerlerdi aınalymǵa engizý jumystary da jalǵasyp jatyr. Máselen, 2022-2025 jyldary aýdan, qala ákimdikteri 39 konkýrs ótkizip, jalpy kólemi 405,7 myń gektar bolatyn 1398 jer ýchaskesin jaldaý quqyǵymen tabystaǵan. Onyń 23,3 myń gektary — egistik, 382,4 myń gektary — jaıylymdyq jerler.
— Al bıyl aýyl sharýashylyǵy maqsatyndaǵy 140 myń gektar jerdi aınalymǵa engizý josparlanǵan. Búgingi kúnge deıin konkýrs arqyly 82 myń gektar jer aınalymǵa berildi. Qalǵan 58 myń gektardy jyl sońyna deıin aýyl sharýashylyǵy aınalymyna engizý kózdelip otyr, — dedi spıker.
Buǵan deıin Túrkistanda turǵyndar jaıylym jerdiń jekege ótip ketkenine narazylyq bildirgenin jazǵan edik.
