Túrkistan oblysynda 20 mln teńge sýbsıdııany zańsyz alǵan kooperatıv basshysy sottaldy
TÚRKІSTAN. KAZINFORM — Túrkistan oblysy Arys aýdanynyń prokýratýrasy agroónerkásip salasynda júrgizgen tekserý nátıjesinde bıýdjet qarajatyn asa iri mólsherde jymqyrý faktisin anyqtaldy.
— «Y» aýyl sharýashylyǵy óndiristik kooperatıviniń tóraıymy 2021 jyldyń sáýir aıynda aqparattyq júıege kooperatıv atyna 2470 bas analyq iri qara maldy jalǵa alǵany týraly jalǵan málimet, sondaı-aq selektsııalyq jumystar júrgizý úshin 120 bas asyl tuqymdy buqany jalǵa alǵany jóninde aqparat engizgen, — delingen Túrkistan oblysy prokýratýrasy habarlamasynda.
Sáıkesinshe memleketten kooperatıvtiń banktik esepshotyna 24 700 000 teńge kóleminde sýbsıdııa qarajaty aýdarylǵan.
Alaıda is júzinde selektsııalyq jumystar tek 18 bas asyl tuqymdy buqa jáne 450 bas analyq iri qara malǵa ǵana júrgizilip, zańsyz alynǵan sýbsıdııa somasy 20 200 000 teńge bolǵan.
Atalǵan fakti boıynsha prokýratýra qylmystyq kodekstiń 190-baby 4-bóligi 2) tarmaǵy (asa iri mólsherde alaıaqtyq) boıynsha sotqa deıingi tergep-tekserýdi bastaǵan.
— Sottyń 20 aqpan 2026 jylǵy úkimimen «Y» aýyl sharýashylyǵy óndiristik kooperatıviniń tóraıymy atalǵan bap boıynsha kináli dep tanylyp, oǵan 4 jyl merzimge bas bostandyǵynan aıyrý jáne 5 jyl merzimge kommertsııalyq uıymdarda basshylyq laýazymdardy atqarý quqyǵynan aıyrý jazasy taǵaıyndaldy, — delingen prokýratýra habarlamasynda.
Zańsyz alynǵan aqshalaı qarajat tolyq kólemde óndirilip, memleket kirisine qaıtaryldy.
Úkim zańdy kúshine engen joq.
Aıta ketelik ShQO sharýalary kún panelderi boıynsha sýbsıdııa baǵdarlamasynan keıin mıllıondaǵan qaryzǵa batqany týraly jazǵan edik.
