Túrkistan oblysynda 20 myńnan asa jas alǵash ret daýys beredi
TÚRKІSTAN. KAZINFORM — Túrkistan oblysynda QR Quryltaı depýtattaryn saılaýǵa daıyndyq jumystary jalǵasyp jatyr.
Oblystyq aýmaqtyq saılaý komıssııasynyń málimetinshe, óńirde 2 mln 146 myń 700 adam turady. Onyń ishinde 1 mln 204 myń 659 azamattyń daýys berý quqyǵy bar, bul — oblys halqynyń 56 paıyzy.
— Aldaǵy QR Quryltaı depýtattarynyń saılaýynda Túrkistan oblysynda 20 292 jas alǵash ret daýys berý quqyǵyn paıdalanady. Olardyń ishinde 114 azamat dál saılaý kúni — 23 tamyzda kámelet jasyna tolyp, óz tańdaýyn jasaıdy, — delingen resmı habarlamada.
Saılaýdy uıymdastyrý úshin oblysta 952 ýchaskelik saılaý komıssııasy jumys isteıdi. Bıyl demografııalyq ósim men jańa turǵyn úı alaptarynyń kóbeıýine baılanysty Túrkistan qalasynda 3, Saýran aýdanynda 1 jańa saılaý ýchaskesi ashyldy. Sondaı-aq turǵyndarǵa qolaıly jaǵdaı jasaý maqsatynda 6 saılaý ýchaskesiniń shekarasy qaıta qaraldy.
Qazirgi ýaqytta óńirdegi barlyq 952 saılaý ýchaskesi qajetti materıaldyq-tehnıkalyq bazamen tolyq qamtamasyz etilgen.
Buǵan deıin Túrkistanda saılaýshylarǵa jaǵdaı jasaý úshin tsıfrlyq tehnologııalar qoldanylyp jatqanyn habarlaǵan bolatynbyz.
