Túrkistan oblysynda 20 adam sýǵa batyp qaıtys boldy
Jyl basynan beri Túrkistan oblysynda 20 adam sýǵa batyp qaıtys boldy, onyń 13-i – kámeletke tolmaǵan bala. Bul týraly Túrkistan oblysy TJD bastyǵynyń mindetin ýaqytsha atqarýshy Baqytjan Zaparov málimdedi, dep habarlaıdy QazAqparat tilshisi.
Qaza tapqandardyń kópshiligi Otyrar aýdanynda tirkelgen. Munda 11 adam sýǵa tunshyǵyp qaıtys bolǵan. Sondaı-aq sýǵa shomylý kezinde ajal qushqandardyń sany Shardara aýdanynda 3, Báıdibek aýdany men Arys qalasynda 2, Sozaq pen Ordabasy aýdanynda 1 adamnan tirkelip otyr.
«1-maýsym – jazǵy shomylý maýsymy bastalǵannan beri 18 adam sýǵa batyp qaza tapty. Atalǵan kórsetkish ótken jylmen salystyrǵanda 74%-ǵa kóbeıgenin kóremiz. Jas balalardyń qaza tabýynyń negizgi sebebi ata-analardyń salǵyrttyq tanytyp, balalaryn qaraýsyz qaldyrýy bolyp otyr», - dedi azamattyq qorǵaý polkovnıgi Baqytjan Zaparov.
