Túrkistan oblysynda 2 adam jumys ornynda qaza tapqan
TÚRKІSTAN. KAZINFORM — Jyldyń alǵashqy toqsanynda oblysta óndiristik jaraqattaný boıynsha 10 jazataıym oqıǵa tirkelip, 13 adam zardap shekti.
Eńbek jáne halyqty qorǵaý mınıstrligi Memlekettik eńbek ınspektsııasy komıteti Túrkistan oblysy boıynsha departamentiniń habarlaýynsha, jyldyń alǵashqy úsh aıynda óńirde eńbek qatynastary salasyna 874 azamattan aryz-shaǵym túsken, onyń 796-sy zań talaptaryna saı qaralǵan. Túsken ótinishterdiń 65 paıyzy — memlekettik organdardyń jumysyna, 35 paıyzy — jeke sektorǵa qatysty.
— Aryz-shaǵymdar negizinde 87 tekserý júrgizilip, 134 zań buzý anyqtaldy. Nátıjesinde 10,1 mln teńge kóleminde aıyppul salynyp, onyń 90 paıyzy óndirildi. Óndiristik jaraqattaný boıynsha 10 jazataıym oqıǵa tirkelip, 13 adam zardap shekti. Onyń ishinde 4-eýi aýyr, 7-eýi jeńil jaraqattansa, 2 adam jumys ornynda kóz jumdy. Jaraqattaný derekteri negizinen densaýlyq saqtaý jáne shaǵyn kásipkerlik salalarynda tirkelgen, — dedi departament basshysynyń orynbasary Murat Tólendıev.
Spıkerdiń aıtýynsha, atalǵan óndiristik jaraqattar boıynsha jumys berýshilerge qatysty qylmystyq is qozǵaý úshin 4 is-qujat quqyq qorǵaý organdaryna joldanǵan.
Búginde oblysta 5425 belsendi kásiporyn jumys isteıdi. Onyń 3322-i (61,2%) óz qyzmetkerlerin jazataıym oqıǵadan saqtandyrý shartyn jasaǵan. Al 2103 kásiporyn jumyskerlerin saqtandyrýmen qamtymaǵan.
Budan buryn habarlaǵanymyzdaı, Qazaqstanda byltyr óndiristik jazataıym oqıǵalar sany 1380-ge jetken.
