Túrkistan oblysynda 2 adam botýlızmge shaldyqty
Túrkistan oblysynda botýlızmge shaldyqqan azamattyń biri jansaqtaý bóliminde jatyr, dep habarlaıdy Kazinform.
Naýqastanýshylar Sozaq jáne Ordabasy aýdandarynyń 34-39 jastaǵy turǵyndary bolyp shyqty. Anyqtalǵandaı, olar úı jaǵdaıynda daıyndalǵan konservilengen qııar tutynǵan. Nátıjesinde eki azamatta da mazasyzdaný, qusý, bas aınalý, jutyna almaý syndy botýlızmge tán klınıkalyq kórinister baıqalǵan.
Sozaq aýdanynyń 34 jastaǵy turǵyny aýyr halde aýdandyq aýrýhananyń jansaqtaý bólimine jatqyzylsa, Ordabasy aýdanynyń 39 jastaǵy turǵyny aýdandyq aýrýhanada em alyp jatyr.
«Atalǵan jaıt boıynsha sanıtarııalyq-epıdemıologııalyq baqylaý basqarmasynyń qyzmetkerleri emdeý mekemeleri tarapynan túsken jedel habarlama negizinde aýrý oshaqtarynda sanıtarııalyq-epıdemııaǵa qarsy is-sharalaryn júrgizip, naýqastarmen baılanysta bolǵan azamattardy tirkeýge aldy. Tamaqtan ýlanýdyń, botýlızmniń aldyn alý maqsatynda sanıtarııalyq aǵartý jumystaryn júrgizdi. Qazirgi tańda adam densaýlyǵyna zııan keltirgen oqıǵa boıynsha zerdeleý jumystary jalǵasýda. Oblystyń sanıtarlyq dárigerleri turǵyndardy konservilengen salattar men tuzdyqtardy tutynarda, dúkenderden satyp alatyn taǵamdardyń jasalý tehnologııasy men daıyndalǵan merzimderine asa mán berýge shaqyrady!» - dedi Túrkistan oblysynyń SEBD basshysy N. Nyshanov.
Aıta keteıik, 2023 jyly óńirde 4 adam botýlızmmen aýyrǵan bolatyn.
