Túrkistan oblysynda 192 eldi meken turǵyndary aýyz sýdy keste boıynsha tutynady
TÚRKІSTAN. KAZINFORM — Shalǵaıda ornalasqan aýyldarda aýyz sý tapshylyǵy áli de bar.
Túrkistan oblysynyń energetıka jáne turǵyn úı-kommýnaldyq sharýashylyq basqarmasy júrgizgen monıtorıng nátıjesi óńir turǵyndarynyń sapaly aýyzsýmen qamtamasyz etilý deńgeıiniń turaqty túrde ósip kele jatqanyn kórsetedi. Degenmen, keıbir aýyldarda sý jetkiliksizdigi áli de bar.
Bıylǵy jyly bıýdjet qarajaty esebinen 66 sý nysanyn salýǵa qarajat bólingen. Onyń 38-i bıyl aıaqtalyp, paıdalanýǵa berilý josparlanyp otyr, al qalǵan 28 nysan 2026 jyldyń sońyna deıin paıdalanýǵa beriledi. Aldyńǵy qatarly ındıkatorǵa 30 myńnan astam adam turatyn 30 eldi meken engizilgen. Bul jerlerdegi jobalar eń birinshi bolyp aıaqtalady.
Sonymen qatar, shalǵaıdaǵy 8 aýyl qazirgi qolda bar sý kózderinen sýmen qamtamasyz etilip otyr.
— Saryaǵash aýdanyndaǵy eki, Keles aýdanyndaǵy tórt jáne Shardara aýdanyndaǵy eki aýylǵa keshendi bloktyq modýlder ornatý josparlanyp otyr, — dep málimdedi Túrkistan oblystyq energetıka jáne turǵyn úı-kommýnaldyq sharýashylyq basqarmasynyń mamandary.
Qazirgi tańda oblysta 756 eldi mekende sýmen qamtamasyz etý júıesi bar. Onyń 165-i betki sý kózderinen, 591-i jer asty sý kózderinen sý alady. 548 aýylda 24 saǵattyq sýmen qamtamasyz etý júıesi qalyptasqan. Alaıda 192 eldi mekende sý keste boıynsha beriledi, 16 aýylda sý berý ýaqytsha toqtatylǵan. 83 aýylda keste tek jaz mezgilinde, al 109 aýylda jyl boıyna qoldanylady.
Negizgi problemalar sý kóleminiń azaıýy men tazartý qurylǵylarynyń jetkiliksiz qýatymen baılanysty. 22 aýylda jaǵdaı eskirgen ınfraqurylymǵa baılanysty qıyndap otyr. Osy máselelerdi sheshý maqsatynda bıyl 33 eldi mekendi úzilissiz aýyz sýmen qamtamasyz etýge 12,7 mlrd teńge bólindi.
Jalpy, 2026 jylǵa deıin júıege taǵy 101 eldi meken qosylsa, 2027–2028 jyldary qosymsha 58 eldi meken sýmen qamtamasyz etiledi.
— Prezıdent Qasym-Jomart Toqaev 2025 jyldyń sońyna deıin el turǵyndarynyń 100 paıyzyn sapaly aýyzsýmen qamtamasyz etý mindetin qoıǵan. Búgingi tańda Túrkistan oblysynyń qalalary tolyq sýmen qamtamasyz etilgen, al aýyldardaǵy qamtamasyz etý deńgeıi 98,1%-ǵa jetti. Qurylys jumystarynyń barysy shtabtyń turaqty baqylaýynda jáne oblys ákiminiń jeke baqylaýynda tur, — delingen Túrkistan oblysy ákimdiginiń aqparatynda.
Aıta keteıik, budan buryn Túrkistan oblysyndaǵy arheologııalyq eskertkishter maqta alqabynyń astynda búlinip jatqanyn jazǵan bolatynbyz.