Túrkistan oblysynda 19 myń basqa arnalǵan mal bırjasy salynyp jatyr
TÚRKІSTAN. KAZINFORM – Túrkistan oblysynyń Saıram aýdanynda bir mezette 19 myń bas mal qabyldaýǵa qaýqarly mal bırjasynyń qurylysy bastaldy. Jobaǵa 5,2 mlrd teńge ınvestıtsııa salynady, dep habarlaıdy Aýyl sharýashylyǵy mınıstrligi.
Jobany «RED GOLD» seriktestigi zamanaýı tehnologııalyq sheshimder men halyqaralyq standarttardy qoldana otyryp júzege asyryp jatyr.
Jabdyqtar men materıaldardyń 30%-y Avstralııadan jetkizilse, metall konstrýktsııalardyń 70%-yn túrkııalyq Agro Fine kompanııasy qamtamasyz etedi.
Jobany júzege asyrý úshin 24 gektar jer ýchaskesi bólingen. Qazirgi ýaqytta qurylys alańynda jer jumystary júrgizilip, irgetas qalaýǵa daıyndyq júrip jatyr. Keshen qurylysyn tolyq aıaqtap, 2026–2027 jyldary paıdalanýǵa berý josparlanǵan.
– Jańa mal bırjasy bir mezette 5 myń basqa deıin iri qara mal, 4 myń jylqy jáne 10 myń basqa deıin usaq mal qabyldaýǵa eseptelgen, – delingen mınıstrlik málimetinde.
Aýyl sharýashylyǵy janýarlaryn saýdalaýǵa arnalǵan zamanaýı alań mal ótkizýdiń ashyq ári júıeli júıesin qalyptastyrýǵa múmkindik beredi. Sondaı-aq ótkizý naryqtarynyń geografııasyn keńeıtip, óńirdiń eksporttyq múmkindikterin arttyrý kózdelip otyr.
Jobany iske asyrý Túrkistan oblysynda mal sharýashylyǵyn damytýǵa jáne agroónerkásiptik keshenniń zamanaýı ınfraqurylymyn qalyptastyrýǵa baǵyttalǵan.
Aıta keteıik, Soltústik Qazaqstanǵa shetelden 6 myńnan astam asyl tuqymdy mal ákelinedi.
