Túrkistan oblysynda 182 jasóspirim júkti bolyp qalǵan
TÚRKІSTAN. KAZINFORM - Erte júktiliktiń aldyn alý maqsatynda óńirde «Reprodýktıvti densaýlyqty saqtaý» aptalyǵy ótip jatyr. Bul týraly Túrkistan oblysy Densaýlyq saqtaý basqarmasy basshysynyń orynbasary Baýyrjan Satybaldy Túrkistan óńirlik kommýnıkatsııalar qyzmetinde ótken brıfıngte málimdedi.
Aptalyqtyń basty maqsaty – halyqtyń reprodýktıvti densaýlyq máseleleri týraly aqparattandyrý, salaýatty ómir saltyn nasıhattaý jáne urpaqty bolý júıesimen baılanysty aýrýlardyń aldyn alý. Aptalyq aıasynda aqparattyq-túsindirý is-sharalary, densaýlyq saqtaý ortalyqtarynda ashyq esik kúnderi, jasóspirimderge arnalǵan tegin medıtsınalyq tekserýler men keńester uıymdastyrylady.
Brıfıngte QR Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııa múshesi Nazym Janǵazınova ata-ana men bala arasynda josparlanbaǵan júktilik jóninde ashyq áńgime bolýy kerektigin aıtyp, ult bolashaǵyna jaýapkershilikpen qaraýǵa shaqyrdy. Al Túrkistan oblysy Densaýlyq saqtaý basqarmasy basshysynyń orynbasary Baýyrjan Satybaldy Túrkistan oblysy týý kórsetkishi boıynsha elimizdegi kósh bastap kele jatqanyn jetkizdi.
«Ótken jyly óńirde 56 myńǵa jýyq náreste dúnıege kelse, osy jyldyń alǵashqy 5 aıynda 20 myń 859 sábı dúnıe esigin ashyp otyr. Ana men bala densaýlyǵy – el bolashaǵynyń jarqyn bolýynyń negizi. Búgingi tańda oblysymyzda 500 myńǵa jýyq bala týýǵa qabiletti jastaǵy áıelder bar. Onyń ishinde 28 myńnan astam áıel júkti bolyp tirkelgen. Sonymen qatar 182 jasóspirimniń júktiligi tirkelip otyr. Jyl saıyn Qazaqstanda jatyr moıny obyrynyń 1900-ge jýyq jańa jaǵdaıy anyqtalyp, 600-ge jýyq áıel osy dertten kóz jumady. Reprodýktıvti densaýlyqty qorǵaý aptalyǵy aıasyndaǵy jumystar halyq densaýlyǵyn nyǵaıtýǵa septigin tıgizedi degen úmittemin», - dedi Baýyrjan Satybaldy.
