Túrkistan oblysynda 180 myńǵa jýyq kópbalaly ana bar
TÚRKІSTAN. KAZINFORM - Túrkistan oblysy kópbalaly analardyń sany jaǵynan el boıynsha aldyńǵy orynǵa shyqty. Óńirde 2500 jýyq «Batyr ana», 17 myńnan astam «Altyn alqa», 4 myńǵa jýyq «Ana dańqy» ordeniniń ıegeri turady.
Túrkistan oblysynda 8-naýryz merekesine oraı «Álemniń jaryǵy – ana» atty merekelik is-shara uıymdastyryldy. Onda ardaqty analar men arýlarǵa qurmet kórsetildi.
Saltanatty jıynda oblys ákimi Darhan Satybaldy ardaqty analar men qyz-kelinshekterdi merekemen quttyqtady.
«Qazaq halqy qyz balasyn asa qadirlep, ardaqty analardy qurmettegen. Qaryndasty qorǵap, arýlardy aıalaǵan. Qazaqylyqtyń qaımaǵy saqtalǵan Túrkistan óńirinde de názikjandylardyń quqyǵyn qorǵaý, olardy jan-jaqty qoldaý baǵytynda jumys júrip jatyr. Oblysta «Bórte», «Domalaq ana», «Farıza» qoıylymdary kórermen nazaryna usynyldy. Bul mádenı izdenisterdi analarǵa, arýlarǵa degen qurmet dep bilemiz. Táýelsiz elimizdiń damýyna analarymyzdyń, qazaqtyń qaısar qyz-kelinshekteriniń qosqan úlesi aıyryqsha», - degen Darhan Satybaldy aq jaýlyqty analar men isker arýlardy arnaıy marapattady.
Merekelik is-shara kontserttik baǵdarlamamen jalǵasty.
