Túrkistan oblysynda 18 ret jyldamdyqty asyrǵan sheteldik júrgizýshi ustaldy
TÚRKІSTAN. KAZINFORM – Túrkistan oblysynda jol erejesin jıi buzǵan sheteldik júrgizýshi jaýapqa tartyldy.
Oblystyq polıtsııa departamentiniń málimetinshe, zań buzý faktisi Otyrar aýdanynda áshkerelendi.
Patrýldik polıtsııa ınspektorlarynyń qyzmettik planshetine «Qorǵaý» baǵdarlamasy arqyly jol erejesin birneshe ret buzǵan jáne aıyppuldaryn ýaqytyly tólemegen «Nissan» avtokóligi týraly habarlama túsken.
Tártip saqshylary kólikti dereý toqtatyp, tekserý júrgizdi. Nátıjesinde sheteldik memlekettik nómir taqqan kóliktiń júrgizýshisi de shetel azamaty ekeni belgili boldy.
– Júrgizýshiniń shamamen 600 myń teńge kóleminde tólenbegen aıyppuly bolǵan. Ol bir jyl ishinde belgilengen jyldamdyqty 18 ret asyrǵan. Sonymen qatar jol tańbalarynyń talaptaryn saqtamaǵany úshin ákimshilik jaýapkershilikke tartylǵan, – delingen habarlamada.
Polıtsııa málimetinshe, jyl basynan beri Otyrar aýdanynda «Qorǵaý» júıesi arqyly aıyppulyn tólemegen 97 quqyq buzýshy anyqtaldy. Onyń 65-i qaryzyn ótese, 32 avtokólik aıypturaqqa qoıylǵan.
Budan buryn Túrkistan oblysynda 45 ret jol erejesin buzǵan júrgizýshiniń 1,3 mln teńge kólemindegi bereshegi anyqtalǵanyn jazǵan edik.
