Túrkistan oblysynda 172 mlrd teńgelik taý shańǵysy klasteri salynýy múmkin
ASTANA. KAZINFORM — Joba Túrkistan oblysyn Ortalyq Azııadaǵy jetekshi taý týrızmi ortalyqtarynyń birine aınaldyrýǵa baǵyttalǵan, dep habarlaıdy Úkimettiń baspasóz qyzmeti.
QR Premer-mınıstriniń birinshi orynbasary Nurlybek Nálibaev Túrkistan oblysyna jumys sapary barysynda «Saıram-Ógem» memlekettik ulttyq tabıǵı parkinde ekologııalyq týrızmdi damytý máselelerine arnalǵan kóshpeli keńes ótkizdi. Іs-sharaǵa 50-den astam otandyq jáne sheteldik áleýetti ınvestor qatysyp, óńirde júzege asyrylady dep josparlanǵan ınvestıtsııalyq jobalar talqylandy.
Keńes barysynda Memleket basshysy Qasym-Jomart Toqaevtyń tapsyrmasyna sáıkes, ekotýrızmdi damytý, tabıǵı aýmaqtardy saqtaı otyryp týrıstik ınfraqurylymdy jetildirý jáne ınvestıtsııa tartý máselelerine erekshe nazar aýdaryldy.
Qazaqstan Respýblıkasynyń ekologııa jáne tabıǵı resýrstar mınıstri Erlan Nysanbaev ulttyq parkterdiń týrıstik áleýetin tıimdi paıdalaný, halyqaralyq deńgeıdegi ekotýrızm nysandaryn qalyptastyrý jáne turaqty týrızm qaǵıdattaryn engizý baǵytyndaǵy jumystar týraly baıandady. Onyń aıtýynsha, bul bastamalar óńirdiń týrıstik áleýetin arttyryp qana qoımaı, jańa jumys oryndaryn ashýǵa, jergilikti ekonomıkany damytýǵa jáne tabıǵı resýrstardy tıimdi paıdalanýǵa múmkindik beredi. Sondaı-aq ınvestorlarǵa kórsetiletin memlekettik qoldaý sharalary tanystyryldy.
Kezdesý barysynda «Saıram-Ógem» ulttyq parkiniń aýmaǵynda júzege asyrylady dep josparlanǵan birqatar ınvestıtsııalyq joba usynyldy. Atap aıtqanda, Birkólik shatqalynda ekologııalyq, otbasylyq jáne belsendi týrızmdi damytýǵa arnalǵan demalys aımaǵyn salý jobasy tanystyryldy. Sonymen qatar Qasqasý shatqalynda týrıstik-rekreatsııalyq keshen salý jáne Saıramsý shatqalynda týrıstik ınfraqurylym qalyptastyrý jónindegi bastamalar qaraldy.
Sondaı-aq Tólebı jáne Túlkibas aýdandarynda halyqaralyq standarttarǵa saı týrıstik apart-keshender salý josparlary usynyldy. Jobalar aıasynda apartamentter, býtık-qonaqúıler, demalys aımaqtary, qoǵamdyq keńistikter men servıstik nysandar salý kózdelgen.
Keńeste KASKASU halyqaralyq taý shańǵysy klasteriniń tujyrymdamasy da tanystyryldy. Joba Túrkistan oblysyn Ortalyq Azııadaǵy jetekshi taý týrızmi ortalyqtarynyń birine aınaldyrýǵa baǵyttalǵan. China Construction Sixth Engineering Bureau Corp. LTD kompanııasymen birlesip júzege asyrý josparlanyp otyrǵan joba aıasynda halyqaralyq standarttarǵa saı taý-kýrorttyq ınfraqurylym qalyptastyrý kózdelgen.
Joba sheńberinde týrıstik aýyldar, qonaqúıler, otbasylyq demalys aımaqtary, sport jáne oıyn-saýyq nysandary, sondaı-aq zamanaýı aspaly joldar salý josparlanǵan. Kýrorttyń jyl boıy jumys isteýine múmkindik beretin ınfraqurylym qalyptastyrylyp, óńirdiń týrıstik tartymdylyǵyn arttyrý kózdelýde. Jobanyń jalpy ınvestıtsııalyq kólemi shamamen 172 mlrd teńgeni quraıdy.
Keńes qorytyndysy boıynsha Nurlybek Nálibaev ekotýrızm tabıǵatty qorǵaý men ekonomıkalyq damýdy ushtastyratyn mańyzdy baǵyt ekenin atap ótti. Onyń aıtýynsha, ınvestıtsııalyq jobalardy iske asyrý kezinde qurylys sapasyna, ekologııalyq talaptardyń saqtalýyna jáne belgilengen merzimderdiń oryndalýyna erekshe nazar aýdarý qajet.
— Prezıdent Qasym-Jomart Toqaevtyń tapsyrmasyna sáıkes, ekotýrızm ekonomıkanyń basym baǵyttarynyń biri retinde aıqyndaldy. Bul — tabıǵı baılyǵymyzdy saqtaı otyryp, ony el ıgiligine tıimdi paıdalaný jolyndaǵy mańyzdy bastama. Sondyqtan barlyq usynys muqııat zerdelenip, naqty eseptelgen ári júzege asatyn jobalarǵa basymdyq berilýi tıis. Biz bastamashyl jáne jaýapty ınvestorlardy qoldaýǵa daıynbyz. Eń bastysy — sapaly nátıjege qol jetkizý jáne jobalardy ýaqtyly júzege asyrý, — dedi Nurlybek Nálibaev.
Premer-mınıstrdiń birinshi orynbasary ınvestıtsııalyq jobalardy júzege asyrýda ınvestorlar jaýapkershiligine erekshe toqtaldy. Onyń aıtýynsha, árbir joba naqty mindettemeler men belgilengen merzimderge sáıkes oryndalýy tıis. Kelisimshart talaptary saqtalmaǵan jaǵdaıda jer ýchaskesi memleketke qaıtarylady.
— Bizge ádemi eskızder emes, naqty nátıje qajet. Sondyqtan árbir joba boıynsha mindettemeler men júzege asyrý merzimi naqty belgilenýi tıis. Eger ınvestor óz mindettemelerin oryndamasa, jer memleketke qaıtarylady, — dedi Nurlybek Nálibaev.
Jumys sapary barysynda Nurlybek Nálibaev Túrkistan oblysynyń ákimi Nuralhan Kósherovpen birge tikushaq arqyly «Saıram-Ógem» ulttyq parkiniń aýmaǵyn áýeden sholyp, tabıǵı jáne týrıstik áleýetimen tanysty. Tabıǵı ekojúıeni saqtaý jáne týrıstik ınfraqurylymdy damytý baǵytyndaǵy jumystar qaraldy.
Kóshpeli keńes qorytyndysy boıynsha jaýapty memlekettik organdarǵa jáne ınvestorlarǵa ekotýrızmdi damytýǵa baǵyttalǵan jobalardy jedel iske asyrý, ınvestorlarmen ózara is-qımyldy kúsheıtý, ulttyq parktiń halyqaralyq týrıstik tartymdylyǵyn arttyrý jáne barlyq jobalardyń sapaly ári belgilengen merzimde júzege asyrylýyn qamtamasyz etý jóninde naqty tapsyrmalar berildi.
Osydan buryn Nálibaev Qostanaı oblysyndaǵy iri jobalardyń júzege asyrylý barysymen tanysqanyn jazǵanbyz.
