Túrkistan oblysynda 166 mln teńge qaryzy bar 21 boryshker qumar oıynǵa aqsha salǵan
TÚRKІSTAN. KAZINFORM – Ótken jyly óńirde alımentten jaltarǵan 19 boryshkerge QK-tiń 139-babymen qylmystyq is qozǵalǵan.
Oblys prokýratýrasy alımentterdi óndirý týraly atqarý qujattaryn taldaý barysynda sot oryndaýshylarynyń birqatar zań buzýshylyqqa jol bergenin áshkereledi.
– Alıment boıynsha bereshegi 166 mln teńgeden asatyn 21 boryshkerdiń býkmekerlik keńselerge, ıaǵnı qumar oıyndarǵa 15 mln teńgeden astam qarjy salǵany anyqtaldy. Qazirgi tańda oblys prokýratýrasymen atalǵan tulǵalardy qylmystyq jaýapqa tartýǵa baǵyttalǵan is-sharalar júrgizilip jatyr, – dep habarlady oblys prokýratýrasy.
Sondaı-aq oblysta jalpy 1,5 mlrd teńge bereshegi bar 1 167 boryshkerge respýblıka aýmaǵynan shyǵýǵa shekteý qoıylmaǵan, al 18 mln teńge qaryzy bar 21 boryshkerdiń shyǵýyna qatysty derek tirkelgen. Budan bólek, 170 mln teńge qaryzy bar 120 boryshkerge qatysty múlkinen óndirip alý sharalary jáne 2 635 boryshkerge avtokólik basqarý quqyǵyn ýaqytsha toqtatý sharalary qoldanylmaǵany belgili boldy.
– Oblys prokýratýrasynyń bastamasymen boryshkerler men olardyń otbasylaryna áleýmettik-quqyqtyq kómek kórsetý qolǵa alynyp, sot oryndaýshylar «FSM Social» baǵdarlamasyna qosyldy. Endigi jerde sot oryndaýshylaryna boryshkerlerdi jumysqa ornalastyrý, ondaı otbasylarǵa áleýmettik jáne rýhanı kómek kórsetý elektrondyq ádispen júrgiziledi, – delingen vedomstvo taratqan aqparatta.
Budan buryn 600 mlrd teńgelik zańsyz qumar oıyn shemasy boıynsha toǵyz adam qamaýǵa alynǵanyn jazǵan edik.