Túrkistan oblysynda 16 jasar qyzdyń ólimine qatysty sot úkimi shyqty

TÚRKІSTAN. KAZINFORM — Túrkistan oblysy Ordabasy aýdany Tórtkúl aýylyndaǵy 16 jasar qyzdyń ólimi qatysty sot úkimi jarııalandy.

Túrkistan oblysynyń qylmystyq ister jónindegi mamandandyrylǵan aýdanaralyq sotynda qaralǵan iste aıyptalýshy I. Qylmystyq kodekstiń «Adam óltirý», «Zorlaý» jáne «Seksýaldyq sıpattaǵy zorlyq-zombylyq áreketteri» baptarymen kináli dep tanylyp, ómir boıyna túrmege qamaldy.

Jantúrshigerlik jaǵdaı bıyl 6 maýsymǵa qaraǵan túni shamamen saǵat 00:30–da bolǵan. Sottalýshy jumystan úıine qaıtyp kele jatyp, K. dúkeninde kámeletke tolmaǵan satýshyǵa shabýyl jasaǵan. Ol ony zorlap, basqa da jynystyq zorlyq-zombylyq áreketterin jasaǵan, sodan keıin jábirlenýshini tunshyqtyryp óltirip, qasaqana ólimge ákep soqtyrǵan.

— Sottalýshynyń kinási sot saraptamalar qorytyndylarymen, beınematerıaldarmen jáne qylmystyq istegi basqa materıaldarmen tolyq dáleldendi. Sot úkimimen sottalýshyǵa taǵaıyndalǵan jazalardy qosyp, ómir boıy bas bostandyǵynan aıyrý jazasy taǵaıyndaldy, — delingen Túrkistan oblystyq soty taratqan resmı habarlamada.

Sottalýshydan jábirlenýshiniń ókiline moraldyq shyǵyn retinde 50 mln teńge óndirip alyndy.

Sot úkimi zańdy kúshine engen joq.

Budan buryn Shardaradaǵy qarııanyń ólimi boıynsha is sotqa joldanǵanyn jazǵan edik.