Túrkistan oblysynda 16 qursaq kótergen ana turady
TÚRKІSTAN. KAZINFORM-Saýran aýdanyna qarasty Oranǵaı aýylyndaǵy Qojamberdıevter otbasyn kópshilik ósip-óngen ónegeli áýlet dep biledi. Otanasy Ánjir Qojamberdıeva ómirge alyp kelgen 11 qyz, 5 uldan búgingi kúni 70 jýyq nemere, 50-den astam shóbere súıip otyr.
Kóp balaly otbasy Oranǵaıǵa Túrkistannan kóship kelgen. Joldasy Anarbaı ekeýi kóptegen jyldar boıy temirjolda jumys istegen. Bala tárbıesine basa kóńil bólgen olar ul-qyzdaryna jaqsy tálim berip, kópshil etip ósirgen. Búginde perzentteri ártúrli salanyń bilikti mamandary. Keıýananyń úlken uly 66 jasta bolsa, kishi qyzy 42-de.
Aýdandyq ákimdik te kóp balaly anadan árdaıym habar alyp, qurmet kórsetip otyrady.
Búgin de Saýran aýdanynyń ákimi Maqsat Tańǵatarov pen máslıhat tóraǵasy Serjan Baıysbaev 8 naýryz – Halyqaralyq áıelder merekesine oraı Ánjir Qojamberdıevanyń úıine arnaıy baryp quttyqtady.
Aq jaýlyqty ana da qala basshysyna alǵysyn aıtyp, aq batasyn berdi.
Qazir Ánjir ájeı 87 jasta. Kenje uly Erlan men kelini Sársenkúldiń shańyraǵynda otbasynyń uıytqysy bolyp otyr. Ár mereke saıyn ul-qyzdary qarashańyraqta bas qosyp otyrady. Analarynyń aqylyn tyńdap, keńesine qulaq asady. Altyn qursaqty ana da ár kún saıyn eldiń amandyǵyn Alladan tilep duǵa jasaıdy.
Jalpy, Oranǵaı aýyldyq okrýginde 10 jáne odan da kóp balany ómirge alyp kelgen jıyrmadan astam altyn qursaqty ana bar. Al, «Altyn alqa», «Kúmis alqa» ıeleriniń sany júzden asady eken.
