Túrkistan oblysynda 156 adamǵa bıýdjet qarajaty negizsiz aýdarylǵan
TÚRKІSTAN. KAZINFORM – Eńbek mobıldiligi ortalyǵynda qoǵamdyq jumystarǵa tartylmaǵan, jastar tájirıbesine, alǵashqy jumys oryndaryna joldanbaǵan 156 adamǵa bıýdjet qarajaty negizsiz aýdarylǵan. Bul jaıynda Sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysy Murat Tóleýbaev málimdedi.
Áleýmettik saladaǵy syrtqy taldaý nátıjesimen tanystyrǵan Murat Tóleýbaev jumys oryndaryn bólý kezinde naqty jáne túsinikti krıterıılerdiń joqtyǵy jemqorlyq táýekelderiniń týyndaýyna alyp kelgendigin aıtty.
Máselen, Maqtaaral men Ordabasy aýdandarynda halyq jáne tirkelgen jumyssyzdar sany shamalas bolǵanymen, 2020-2023 jyldary Maqtaaral aýdanyna 3 ese kóp jumys orny bólingen.
«Áleýmettik kómek ortasha tabysy kedeılik sheginen aspaıtyn adamǵa nemese otbasyǵa berilý qajettiligine qaramastan, protsesterdiń ashyq bolmaýy ony shyn máninde qajet etpeıtin adamdarǵa da taǵaıyndaýǵa múmkindik beredi. Máselen, ishinara zerdeleý barysynda 2 nemese odanda kóp jyljymaly jáne jyljymaıtyn múlikteri, sonyń ishinde tabys alyp keletin júk kólikteri bar tulǵalarǵa, áleýmettik kómek taǵaıyndalǵan 22 derek anyqtaldy» - dedi Murat Tóleýbaev.
Al, joldardy jóndeý men salýda, áleýmettik mańyzy bar obektilerge júrgizilgen monıtorıng nátıjesinde kepildik merzimderin qoldanýdyń ártúrli tájirıbesi kezdesken. Atap aıtar bolsaq, merdigerlerdiń sharttarynda kepildik merzimder 1, 3 jáne 5 jylǵa deıin, keıbir sharttarda kepil merzimderi múldem belgilenbegen.
«Bizdiń usynysymyzben, áleýmettik mańyzy bar obektilerdi salý men avtojoldardy kúrdeli jóndeý kezinde eń kemi 7 jyl, avtojoldardy ortasha jóndeý kezinde 5 jyl kepildik merzimderin belgileýge qala, aýdan ákimdikteri ókimder shyǵardy. Nátıjesinde, qurylys sapasyn jaqsartýǵa baǵyttalǵan biryńǵaı praktıka belgilendi. Bul sharalar merdigerlerdiń qurylys jumystarynyń sapasyna jaýapkershilikpen qaraýyna múmkindik beredi» - dedi Murat Tóleýbaev.
