Túrkistan oblysynda 151 qoqys polıgonynyń kóbi talapqa saı emes: másele qalaı sheshiledi
TÚRKІSTAN. KAZINFORM — Túrkistan oblysyndaǵy qatty turmystyq qaldyqtar polıgondarynyń basym bóligi sanıtarlyq-ekologııalyq talaptarǵa saı emes. Óńirde jalpy 151 polıgon esepke alynǵan.
Bul týraly Túrkistan oblysynyń tabıǵı resýrstar jáne tabıǵat paıdalanýdy retteý basqarmasynyń basshysy Ǵalymjan Tólepov málimdedi.
Onyń aıtýynsha, oblystaǵy polıgondardyń 28-i aýdandyq, 37-si aýyldyq okrýgterge tıesili, al 40 nysan senimgerlik basqarýǵa berilgen. Júrgizilgen taldaý olardyń kópshiliginiń belgilengen sanıtarlyq jáne ekologııalyq talaptarǵa saı emestigin kórsetken.
— Máseleni sheshý úshin 2024-2026 jyldarǵa arnalǵan arnaıy is-sharalar jospary bekitildi. Soǵan sáıkes, bir-birine jaqyn ornalasqan eldimekenderdegi polıgondardy biriktirý arqyly 51 nysandy ońtaılandyryp, jabý kózdelgen. 2024 jyly — 24, 2025 jyly — 18, bıylǵy jyldyń 7 aıynda 4 polıgon ońtaılandyryldy. Jyl sońyna deıin taǵy 5 polıgondy jabý josparlanyp otyr, — dedi Ǵalymjan Tólepov.
Zańsyz qoqys oryndary kóbeıip otyr
Polıgondardy talapqa sáıkestendirý jumystary Maqtaaral, Jetisaı, Ordabasy, Sozaq, Túlkibas jáne Saıram aýdandarynda júrgizilip jatyr.
Bul baǵytta Sozaq aýdanynda aýqymdy joba qolǵa alynǵan. Munda jańa 7 polıgon salýǵa 1,7 mlrd teńge qarastyrylǵan. 2024 jyly Qarataý, Qaraqur jáne Jýantóbe polıgondarynyń qurylysy aıaqtalǵan. Al 2025 jyly Shý, Tasty, Sholaqqorǵan jáne Syzǵan aýyldyq okrýgterinde jańa polıgondardyń qurylysy bastaldy. Nysandardy bıyl qazan aıynda aıaqtaý josparlanǵan.
Óńirdegi taǵy bir ózekti másele — beı-bereket qoqys oryndary. «Ǵarysh Sapary» AQ júrgizgen aerotúsirilimder nátıjesinde ótken jyly oblysta 249 zańsyz qoqys orny anyqtalyp, túgel tazartylǵan.
— Al bıyl mamyr-maýsym aılarynda taǵy 242 zańsyz qoqys orny anyqtalsa, shildede qosymsha 8 núkte tirkelgen. Qazirgi ýaqytta olardy tazartý jumystary júrgizilip jatyr, — dedi oblystyq tabıǵı resýrstar jáne tabıǵat paıdalanýdy retteý basqarmasynyń basshysy.
Qazir óńirde qaldyqtardy qolmen suryptaýmen 15, qaıta óńdeýmen nebári 5 kásipker aınalysady.
Salany damytý úshin oblys aýmaǵy 6 aımaqqa bólinip, árqaısysyna qaıta óńdeý baǵytynda jumys isteıtin kásipkerler bekitilgen. Olarǵa «Aýyl amanaty» jobasy arqyly jeńildetilgen nesıe berý tetigi qarastyrylǵan.
Buǵan deıin Túrkistan oblysynda bıylǵy alty aıda ekologııalyq zańnamany buzýdyń 73 deregi anyqtalǵanyn jazǵan edik.
