Túrkistan oblysynda 15 jastaǵy qyzdyń asqazanynan 1 keli shash alyndy

TÚRKІSTAN. KAZINFORM – Túrkistan qalalyq balalar aýrýhanasynda medıtsına tájirıbesinde sırek kezdesetin ári asa kúrdeli ota sátti júrgizildi. 

15 jastaǵy qyz shuǵyl túrde aýrýhanaǵa jetkizilgen. Tekserý barysynda asqazan qýysynda iri kólemdi bógde zat anyqtalǵan. 

Oblystyq densaýlyq saqtaý basqarmasynyń málimetinshe, dárigerler shuǵyl sheshim qabyldap, kúrdeli hırýrgııalyq ota jasady. Naýqastyń asqazanynan salmaǵy 900 gramm bolatyn shash túıini alyndy. 

– Ota 2 saǵat 50 mınýtqa sozyldy. Hırýrgııalyq brıgada, anestezıologter jáne orta medıtsına qyzmetkerleri birlese jumys istep, otany sátti aıaqtady. Qazirgi tańda naýqastyń jaǵdaıy turaqty, dárigerlerdiń baqylaýynda, - delingen habarlamada.

Mamandardyń aıtýynsha, mundaı jaǵdaılar medıtsınada óte sırek kezdesedi jáne der kezinde kómek kórsetilmegen jaǵdaıda aýyr asqynýlarǵa alyp kelýi múmkin.

Budan buryn Túrkistanda 8 aılyq sábıdiń ishinen ıne shyqqanyn jazǵan edik.