Túrkistan oblysynda 15 jastaǵy qyzdy zorlaǵan zeınetker sottaldy

TÚRKІSTAN. KAZINFORM – Túrkistan oblysy Keles aýdanynda 15 jastaǵy qyzdy zorlaǵan 71 jastaǵy er adamǵa sot úkimi shyqty.

Sot materıaldaryna sáıkes, kámeletke tolmaǵan qyz zeınetkerden júkti bolyp, sábı dúnıege ákelgen.

Túrkistan oblystyq sotynyń habarlaýynsha, sottalýshy kámeletke tolmaǵan adamdy zorlaý jáne turǵyn úıge qol suǵylmaýshylyqty buzý baptary boıynsha kináli dep tanyldy.

Oqıǵa Keles aýdanynyń bir aýylynda bolǵan. Buǵan deıin kúdiktiniń jábirlenýshige týystyq qatysy bar ekeni habarlanǵan.

Qyzdyń aıaǵy aýyr ekenin týystary júktiliktiń jetinshi aıynda ǵana bilgen. Náreste 2025 jyldyń qys aıynda Astanada dúnıege kelgen. Jábirlenýshiniń anasy polıtsııaǵa aryzdy bosanǵannan birneshe aı ótken soń, 12 qazan kúni bergen.

– Sot úkimimen B.-ǵa pedagogıkalyq laýazymdardy jáne kámeletke tolmaǵandarmen jumys isteýge baılanysty laýazymdardy atqarý quqyǵynan ómir boıyna aıyra otyryp, 15 jyl 6 aı merzimge bas bostandyǵynan aıyrý jazasy taǵaıyndaldy, - delingen oblystyq sottyń habarlamasynda.

Úkim zańdy kúshine engen joq.

Budan buryn Túrkistan oblysynda 15 jasar qyz 71 jastaǵy týysynan júkti bolyp qalǵanyn jazǵan edik.

Jábirlenýshiniń anasy kúdikti retinde 70 jastaǵy týysyna qatysty aryz túsirip, quqyq qorǵaý organdaryna júgingeni habarlandy.