Túrkistan oblysynda 15 myńǵa jýyq órt qaýipsizdigi erejesi buzylǵan
TÚRKІSTAN. KAZINFORM – Jyl basynan beri óńirde 346 órt tirkelgen. Saldarynan 7 adam qaza taýyp, taǵy 7 adam jaraqattanǵan. Órtten kelgen materıaldyq shyǵyn 1 mlrd 265 mln teńgeden asqan.
Oblystyq tótenshe jaǵdaılar departamentiniń málimetinshe, ótken jylytý maýsymynda óńirde ýly gazdan ýlanýdyń 3 deregi tirkelip, 6 adam kóz jumǵan, taǵy 3 adam jaraqat alǵan.
Vedomstvonyń habarlaýynsha, 15 tamyz ben 5 qazan aralyǵynda oblys aýmaǵynda «Órt qaýipsizdigi» aktsııasy ótkizilip, onyń aıasynda áleýmettik osal topqa jatatyn 27 294 adam esepke alyndy.
– Mamandar osy sanattaǵy azamattardyń úılerin aralap, qaýipsizdik talaptarynyń saqtalýyn tekserdi. Nátıjesinde órt qaýipsizdigi erejeleriniń 14 739 buzýshylyǵy anyqtaldy. Onyń basym bóligi elektr jabdyqtaryn paıdalaný talaptary men pesh murjalaryna qatysty boldy. Qazirgi ýaqytta kemshilikterdi joıý boıynsha qaıta tekserý jumystary júrgizilip jatyr, – delingen departament usynǵan málimette.
Sondaı-aq jyl basynan beri óńirde gazben jabdyqtalǵan 1600-ge jýyq jeke turǵyn úıge ýly gazdy anyqtaıtyn sıgnalızatorlar ornatylǵan. Departament ókilderiniń aıtýynsha, aldaǵy ýaqytta bul baǵyttaǵy jumystar jergilikti atqarýshy organdar men demeýshilerdiń qoldaýymen jalǵasady.
Eske sala ketsek, buǵan deıin elimizde jyl basynan beri turǵyn úılerde 4,8 myńnan astam órt shyqqanyn jazǵan edik.
