Túrkistan oblysynda 1400-ge jýyq adamdy kene shaqqan
TÚRKІSTAN. KAZINFORM – Ótken jyly óńirde brýtsellez aýrýymen 84 jaǵdaı tirkeldi, bul 2024 jylmen salystyrǵanda 78 jaǵdaıǵa artyq. Olardyń 29-y – kámelet jasyna tolmaǵandar. Sondaı-aq Sibir jarasynyń 4, týberkýlezdiń 514 jaǵdaıy anyqtalǵan.
Oblystyq sanıtarııalyq-epıdemıologııalyq baqylaý departamentiniń málimetinshe, ótken jyly óńirde qaýipti juqpaly aýrýlar boıynsha birqatar derek tirkelgen.
– 2025 jyldyń 26 qarashasyna deıin Kongo-Qyrym gemorragııalyq qyzbasyna shaldyqqan 7 naýqas tirkeldi. Onyń ishinde Sozaq, Otyrar, Saýran aýdandarynda – 2, Ordabasy aýdanynda – 1 jaǵdaı anyqtaldy. Bul dertten ólim jaǵdaıy tirkelgen joq. Sonymen qatar, jyl basynan beri kene shaǵyp, medıtsınalyq uıymdarǵa júgingen 1373 adam 14 kúndik medıtsınalyq baqylaýǵa alyndy, – dedi departament basshysy Nurbek Nyshanov.
Oblystyq veterınarııa basqarmasynyń derekterine sáıkes, óńirde brýtsellezge qarsy 4 124 620 bas usaq mal, 893 194 bas iri qara mal jáne 17 003 basqa da janýar tekserilgen. Tekserý nátıjesinde aýrý anyqtalǵan 327 bas usaq mal men 106 bas iri qara mal Saıram aýdanyndaǵy «DS ı Bratıa» et óńdeý kásipornyna ótkizilgen. Aýrý oshaqtarynda veterınarııalyq qyzmetpen birlesken epıdemıologııalyq-epızootııalyq tekserýler júrgizilip, syrtqy ortadan 153 sút óniminiń synamasy alynǵan. Oń nátıje anyqtalǵan aýmaqtarda zalalsyzdandyrý jumystary júrgizildi.
– Sondaı-aq ıesiz janýarlar boıynsha jergilikti ákimdikter tarapynan bólingen 88 mln teńgeden astam qarajat esebinen 18 aýlaý toby qurylyp, 45 822 ıt pen 2 094 mysyq aýlanyp, joıylǵan. Oblystyq «Veterınarııalyq zerthana» mekemesiniń málimetinshe, qutyrýǵa tekserilgen 63 patologııalyq materıaldyń 3 synamasynan oń nátıje anyqtalǵan. Atap aıtqanda, Otyrar aýdanynda – 1 shıbóri, Túrkistan qalasynda – 2 ıtten aýrý belgisi tabylǵan, –dedi departament basshysy.
Al turǵyndar arasynda qutyrý derti tirkelmegenimen, janýarlardan jaraqattanǵan 5994 adamǵa profılaktıkalyq egý taǵaıyndalyp, medıtsınalyq baqylaýǵa alynǵan. Budan bólek zoonozdy teri leıshmanıozy boıynsha oblys aýmaǵynda 56 jaǵdaı anyqtalǵan. Tabıǵı oshaq bolyp sanalatyn Shardara, Otyrar aýdandary men Arys qalasyna qarasty 32 eldimekende jyl saıyn atalǵan aýrýdyń aldyn alý maqsatynda dezınsektsııa jáne deratızatsııa jumystary eki kezeńmen júrgizilip keledi.
Budan buryn Túrkistanda ıt pen mysyqtan zardap shekken 379 adam dáriger kómegine júgingenin jazǵan edik.