Túrkistan oblysynda 125 mln teńgeden astam zalal keltirgen toptyń qylmysy áshkerelendi
TÚRKІSTAN. KAZINFORM – Túrkistan oblysynda shetel azamaty basqarǵan uıymdasqan qylmystyq toptyń alaıaqtyq áreketteri anyqtaldy.
Oblystyq prokýratýranyń arnaıy prokýrorlary alaıaqtyq jáne uıymdasqan qylmystyq top qurý derekteri boıynsha qozǵalǵan qylmystyq is aıasynda sotqa deıingi tergep-tekserýdi aıaqtady.
Tergep-tekserý barysynda 2024-2025 jyldar aralyǵynda shetel memleketiniń azamaty el aýmaǵynda áreket etip, ınternet jáne telefon baılanysy arqyly alaıaqtyq jolymen 21 jábirlenýshige jalpy somasy 125 mln teńgeden astam zalal keltirgen uıymdasqan qylmystyq topty qurǵany jáne basqarǵany belgili boldy.
Alaıaqtyq qylmystar mobıldi baılanys quraldaryn paıdalaný arqyly jasalǵan. Kúdiktiler ózderin poshta uıymdary men baılanys operatorlarynyń qyzmetkerleri retinde tanystyryp, aldaý jolymen azamattardyń atyna nesıe rásimdep, alynǵan aqshalaı qarajatty ıemdengen.
– Sotqa deıingi tergep-tekserý barysynda jábirlenýshilerge 20 mln teńge kólemindegi qarajat qaıtaryldy. Sonymen qatar kúdiktilerge tıesili 3 avtokólikke tyıym salyndy. Qalǵan zalal somasy sot tártibimen májbúrlep óndiriledi, – delingen prokýratýra habarlamasynda.
Qylmystyq is aıasynda 20 kúdikti qamaýǵa alyndy. Taǵy 2 adamǵa halyqaralyq izdeý jarııalandy.
Budan buryn Túrkistan oblysynda 2025 jyly ınternet-alaıaqtarǵa urynǵandar 1,6 mlrd teńgesinen aıyrylǵanyn jazǵan edik.