Túrkistan oblysynda 120 myńǵa jýyq jumys orny ashylady
TÚRKІSTAN. KAZINFORM - Túrkistan oblysynda kedeılikpen jáne jumyssyzdyqpen kúres, áleýmettik saladaǵy kemshilikterdi joıý baǵytynda aýqymdy jumys atqarylyp jatyr. Áleýmettik salaǵa bólingen qarjyny óz maqsatynda tıimdi jumsaý, «barmaq basty, kóz qysty» áreketterdiń jolyn kesý úshin monıtorıngter men tekserýler júrgizilip jatyr. Oblys ákiminiń orynbasary Beısenbaı Tájibaevtyń tóraǵalyǵymen májilis ótip, osy baǵyttaǵy jumystar talqylandy. Jaýapty basqarma men mekeme basshysynyń esebi tyńdaldy.
Osy jyldyń 9 aıynyń qorytyndysymen halyqty jumyspen qamtý jáne kedeılik deńgeıin tómendetý boıynsha atqarylǵan jumystar týraly oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaevanyń baıandamasy tyńdaldy. Onyń aıtýynsha, oblys ákimimen bekitilgen 2024 jylǵy «Óńirdiń jumyspen qamtý kartasy» aıasynda 118,9 myń jumys ornyn ashý josparlanǵan. Onyń ishinde 74,1 myń adamdy turaqty jumys oryndaryna, 44,8 myń adamdy ýaqytsha jumys oryndaryna ornalastyrý kózdelgen. 2024 jyldyń 3 toqsanyndaǵy derek boıynsha 88,9 myń adam Óńirlik karta aıasynda jumyspen qamtyldy. Onyń ishinde 46,2 myń adam turaqty jumysqa ornalassa, 42,7 myń ýaqytsha jumys oryndary ashylǵan. Jospar búginde 74,8% oryndalyp otyr. Jumysqa ornalasqandardyń 96 paıyzymen elektrondyq kelisimshart túzilip, jalpy 85,7% zeınetaqy aýdarymdary tólengen.
Bıyl oblys boıynsha «Eńbek» baǵyty aıasynda 98,2 myń adamdy jumyspen qamtý sharalaryna joldaý josparlanyp, naqty 69,4 myńnan astam azamat qamtylǵan. Jyldyq jospar 70,7 paıyzǵa oryndaldy. Onyń ishinde 27,3 myń azamat turaqty jumysqa ornalasqan.
Jıynda «Eńbek mobıldiligi» ortalyǵynyń dırektory Abzal Kazankapov «Eńbek mobıldiligi» men «Mansap» ortalyqtaryna júrgizilgen tekserý jumystarynyń qorytyndysy týraly baıandady. 2024 jyldyń aqpan aıynda sýbsıdııalanǵan jumys oryndaryn uıymdastyrý barysynda qarjyny jymqyrý faktileri anyqtaldy. Bul rette, ortalyq tarapynan anyqtalǵan faktiler Túrkistan oblysy boıynsha Ekonomıkalyq tergep-tekserý departamentine usynylyp, tergeý jumystary júrgizildi. Nátıjesinde, zań buzýshylyqtardy joıý boıynsha bekitilgen is-shara josparyna sáıkes 82,8 mln. teńge bıýdjetke keri qaıtaryldy. Quzyrly organdardyń usynymyn qaraý barysynda zań buzýshylyqqa jol bergen «Eńbek mobıldiligi» ortalyǵy men «Mansap» ortalyqtarynyń 43 qyzmetkeriniń tártiptik jaýapkershilikteri qaralǵan. Onyń ishinde 16 qyzmetker jumystan bosatylǵan.
Óńirde memleket qarjysynyń maqsatty jumsalýy men zańbuzýshylyqtyń aldyn alý maqsatynda arnaıy jumysshy toby qurylyp, sýbsıdııalanǵan jumys oryndaryna joldanǵan azamattardyń eńbek tártibin saqtaýyna monıtorıng jumystary júrgizilýde. Búgingi kúnge Saryaǵash, Maqtaaral, Jetisaı, Qazyǵurt aýdandary men Túrkistan qalasy boıynsha jumysqa joldanǵan azamattarǵa qońyraý shalý arqyly zerdeleý jumystary júrgizildi. Nátıjesinde, zerdeleýmen qamtylǵan 4422 azamattyń 620-sy jumys orny, atqaratyn jumysy, eńbek aqy kólemi týraly mardymdy jaýap bere almaǵan. Jumystan shyǵarylǵan.
Jyl basynan júrgizilgen monıtorıng jumystarynyń nátıjesinde jumys oryndaryna qabyldanǵan 30,2 myń adamnyń ishinde 1309 adamǵa eńbek tártibin saqtamaǵany úshin kelisimshartty toqtatý sheshimi qabyldandy. Tıisinshe, atalǵan jumys berýshilermen kelisimshart buzylyp, jalǵan qatysýshylardyń eńbekaqysy tólenbeı, bıýdjet qarjysy únemdeldi.
Jıyndy qorytyndylaǵan Beısenbaı Tájibaev jaýaptylarǵa kún tártibindegi 2 másele boıynsha jumysty kúsheıtýdi tapsyrdy. Jumyspen qamtý sharalaryn shıratý, memleket qarjysyn maqsatty jumsaý, eńbekpen qamtylǵan turǵyndardyń jumystaryna kelýin qadaǵalaý, mindetti zeınetaqy jarnalaryn tóleýin nazarǵa alýdy júktedi. Aýdan, qala ákimderi orynbasarlary men áleýmettik salaǵa jaýapty basshylarǵa óz mindetterin adal, sapaly atqarý kerektigin eskertti.
