Túrkistan oblysynda 1,2 mln-ǵa jýyq azamat referendýmda daýys bere alady
TÚRKІSTAN. KAZINFORM – Oblysta 15 naýryzda ótetin respýblıkalyq referendým qarsańynda komıssııa músheleriniń kásibı biliktiligin arttyrýǵa baǵyttalǵan arnaıy jospar bekitilgen. Oǵan sáıkes, úsh kezeń boıynsha oqytý is-sharalary ótedi.
Túrkistan oblysynda respýblıkalyq referendýmdy uıymdastyrý máselelerine qatysty daıyndyq jumystary júrip jatyr.
Oblystyq aýmaqtyq referendým komıssııasynyń málimetinshe, sol kúni óńirde 18 aýmaqtyq jáne 948 referendým ýchaskesi jumys isteıdi.
— Oblys boıynsha 6 254 ýchaskelik referendým komıssııasynyń múshesi qyzmet atqarady. Barlyq ýchaskeler qajetti qural-jabdyqtarmen tolyq qamtamasyz etilip, múgedektigi bar azamattarǵa qolaıly jaǵdaı jasalǵan. Daıyndyq sharalary jergilikti ákimdiktermen birlesip júrgizilip jatyr. Óńirde 1 195 184 azamat saılaýshylar tizimine engizilgen, — delingen habarlamada.
Sondaı-aq referendým qarsańynda komıssııa músheleriniń biliktiligin arttyrýǵa baǵyttalǵan arnaıy jospar bekitilgen. Oǵan sáıkes, komıssııa múshelerine arnalǵan úsh kezeńdik oqytý is-sharalary uıymdastyrylady.
— Alǵashqy kezeńde barlyq aýdandyq jáne qalalyq aýmaqtyq saılaý komıssııalarynyń tóraǵalary, olardyń orynbasarlary men hatshylaryna (58 adam) respýblıkalyq referendýmǵa qatysty semınarlar ótkizý josparlanǵan. Budan soń oblystyq aýmaqtyq referendým komıssııasynyń músheleri aýdandarda ýchaskelik referendým komıssııalarynyń tóraǵalary, orynbasarlary men hatshylaryna (2 912 adam) zańnama talaptary boıynsha semınarlar men keıstik jaǵdaılarǵa arnalǵan trenıngter ótkizedi. Al úshinshi kezeńde qalǵan ýchaskelik referendým komıssııalarynyń 3 410 múshesin oqytý kózdelgen, — dep habarlady oblystyq aýmaqtyq referendým komıssııasy.
Qazirgi tańda oblysta 32 qoǵamdyq birlestik akkredıtteýden ótken. Olar referendým protsesi barysynda baqylaý jumystaryn júzege asyrady.
Eske salaıyq, Konstıtýtsııa jobasyna qatysty referendým qorytyndysy 21 naýryzǵa deıin jarııalanady.
Budan buryn 15 naýryzda Qyzylorda oblysynda 378 referendým ýchaskesi jumys isteıtinin jazǵan edik.