Túrkistan oblysynda 12 myń tonna shóp órtendi
ASTANA. KAZINFORM – Túrkistan oblysynyń Arys qalasyna qarasty Qojatoǵaı aýylynda kásiporyn aýmaǵyndaǵy shamamen 12 myń tonna prestelgen shóp pen bastyrma órtendi, dep habarlaıdy Tótenshe jaǵdaılar mınıstrligi.
Órt týraly habarlama oblystyq 112 qyzmetine kelip túsken.
Oqıǵa ornyna jetken alǵashqy órt sóndirý bólimsheleri jaýapkershiligi shekteýli seriktestik aýmaǵynda bastyrma men prestelgen shóptiń ashyq jalynmen janyp jatqanyn anyqtaǵan.
– Órtti sóndirýge TJM bólimsheleri, orman sharýashylyǵy qyzmetkerleri, «Aýyl qutqarýshylary» eriktileri, sondaı-aq Qorǵanys mınıstrligi men jergilikti atqarýshy organdardyń kúshteri qatysty, – dep habarlady vedomstvo.
Jumyldyrylǵan kúshterdiń birlesken áreketiniń nátıjesinde órt tolyq sóndirildi.
Oqıǵadan zardap shekkender joq. Órttiń shyǵý sebebi anyqtalyp jatyr.
Tótenshe jaǵdaılar mınıstrligi azamattar men aýyl sharýashylyǵy nysandarynyń basshylaryn órt qaýipsizdigi talaptaryn qatań saqtaýǵa, ásirese shóp pen basqa da tez tutanatyn materıaldardy saqtaý kezinde saqtyq sharalaryn kúsheıtýge shaqyrdy.
Aıta keteıik, buǵan deıin Ulytaý oblysynyń Sátbaev qalasynda jeke turǵyn úıdiń aýlasynda jınalǵan 100 býma shóp órtengen edi. Órt tolyq sóndirilip, zardap shekkender tirkelmegen.
