Túrkistan oblysynda 12 adamnyń ómirin qıǵan órttiń aldyn ala sebebi aıtyldy
TÚRKІSTAN. KAZINFORM — Túrkistan oblysy Jetisaı aýdany Alǵabas aýylyndaǵy órt boıynsha tyń derekter belgili boldy.
Bul týraly Túrkistan oblysy tótenshe jaǵdaılar departamenti memlekettik órt baqylaý basqarmasy bastyǵynyń orynbasary Jasulan Aınabekov Jibek Joly efırinde aıtty.
— Órt oqıǵasy bolǵan jerde oblystyq tótenshe jaǵdaı departamenti memlekettik órt baqylaý basqarmasynyń órt synaq zerthanasy jumys istep jatyr. Aldyn ala boljam boıynsha órttiń shyǵý sebebi — elektr jabdyqtaryn qosatyn jelilik fıltrdiń aqaýy. Degenmen órt synaq zerthanasy saraptamasynyń qorytyndysy áli shyqqan joq. Qazirgi tańda tergeý boıynsha anyqtaý qyzmeti taǵaıyndaldy. Tekserý jumystary júrip jatyr. Órttiń naqty neden shyqqany anyqtalyp, qosymsha aqparat beriledi, — dedi ol.
Eske sala keteıik, keshe tań ata Túrkistan oblysy Jetisaı aýdanynyń Alǵabas aýylynda eki qabatty jeke turǵyn úı órtenip, 12 adam mert boldy.
Oqıǵa ornyna órt sóndirýshiler jetkenge deıin turǵyn úı tolyqtaı otqa oranǵan.
Órtti barlaý jáne sóndirý barysynda úıdiń ishinen es-tússiz úsh adam evakýatsııalanyp, jedel medıtsınalyq járdem brıgadasyna tapsyryldy.
Prezıdent Qasym-Jomart Toqaev marqumdardyń jaqyndaryna kóńil aıtty.
Úkimet pen Túrkistan oblysynyń ákimine zardap shekken azamattardyń týǵan-týystaryna barlyq qajetti kómek kórsetip, qaıǵyly oqıǵany jan-jaqty tekserýdi tapsyrdy.
Prezıdent tapsyrmasy boıynsha Túrkistan oblysyndaǵy órtke baılanysty Úkimettik komıssııa quryldy.
Oblys ákimdigi tarapynan zardap shekkender men qaza tapqandardyń otbasyna barlyq qajetti medıtsınalyq, psıhologııalyq jáne áleýmettik kómek kórsetilip jatyr. Sonymen birge marqumdardy jerleý rásimin uıymdastyrýǵa tolyqtaı qoldaý jasalady.
Órtten keıin medıtsınalyq mekemege jetkizilgen úsh adamnyń bireýi esin jıdy.
Vıtse-premer Qanat Bozymbaev órttiń sebebin tergep-tekserý boıynsha qurylǵan Úkimettik komıssııa múshelerine birqatar tapsyrma berdi.