Túrkistan oblysynda 119,4 mln teńgeniń asfalt jabyny qaıta tóseldi
TÚRKІSTAN. KAZINFORM – Túrkistan oblysynda talapqa sáıkes kelmegen materıaldar qoldanylǵan jol ýchaskelerindegi asfalt jabyny merdigerlerdiń óz qarajaty esebinen qaıta tóseldi.
Qazirgi tańda óńirdegi avtomobıl joldarynyń jalpy uzyndyǵy – 17 692 shaqyrym. Onyń ishinde respýblıkalyq mańyzy bar joldardyń 95 paıyzy, jergilikti mańyzy bar oblystyq jáne aýdandyq joldardyń 94,8 paıyzy jaqsy jáne qanaǵattanarlyq jaǵdaıda.
Oblystyq jolaýshylar kóligi jáne avtomobıl joldary basqarmasynyń basshysy Qýatjan Jumataevtyń aıtýynsha, jol sapasyna qatysty jyl basynan beri arnaıy zerthanalar 532 synama alǵan.
– Talapqa sáıkes kelmegen materıaldardy paıdalanǵan merdigerlerge 10 mln teńge aıyppul salyndy. Sondaı-aq merdiger uıymdar óz qarajaty esebinen 15 myń sharshy metr nemese 119,4 mln teńgeniń asfalt jabynyn qaıta tósedi, – dedi spıker.
Resmı málimetke sáıkes, bıyl oblysta avtomobıl joldary salasyn damytýǵa bıýdjetten 35,5 mlrd teńge bólingen. Bul qarajat esebinen 1 138,1 shaqyrymdy qamtıtyn 224 nysanda qurylys jáne jóndeý jumystary atqarylyp jatyr. Jyl qorytyndysy boıynsha 103 nysan nemese 445,2 shaqyrym joldy paıdalanýǵa berý josparlanǵan.
Buǵan deıin Túrkistan oblysynda bir jyl buryn jóndelgen jol ýchaskesi qaıta búlingenin jazǵan edik.
