Túrkistan oblysynda 119 kásipker lıtsenzııasyz alkogol ónimderin satqan
TÚRKІSTAN. KAZINFORM – Túrkistan oblysynda jyl basynan beri kóleńkeli ekonomıkamen kúres aıasynda 667 salyqtyq quqyq buzýshylyq anyqtaldy. Onyń ishinde 119 kásipkerdiń lıtsenzııasyz alkogol ónimderin satqany belgili boldy.
Túrkistan oblysy boıynsha memlekettik kirister departamentiniń basqarma basshysy Sáýle Shyrynbekovanyń aıtýynsha, jyl basynan beri kedendik baqylaý nátıjesinde jalpy salmaǵy 131,9 gramm bolatyn esirtki zattaryn zańsyz alyp ótýdiń 27 faktisi tirkelgen.
– Sonymen qatar munaı ónimderin zańsyz áketýdiń 77 deregi anyqtalyp, sot sheshimimen 2,29 mln teńgeden astam aıyppul salyndy. Jalpy 9,5 tonna benzın men 8,1 tonna dızel otyny tárkilendi, – dedi spıker.
Budan bólek jalpy somasy 64,3 myń AQSh dollaryn quraıtyn valıýtany zańsyz áketýdiń úsh faktisi anyqtaldy. Sondaı-aq reıdtik is-sharalar barysynda salyq zańnamasyn buzýdyń 667 deregi tirkelgen.
– Onyń ishinde 386 jaǵdaıda baqylaý-kassa mashınasy qoldanylmaǵan, 151 azamat jeke kásipker retinde tirkelmeı kásipkerlik qyzmetpen aınalysqan. Sondaı-aq 11 jaǵdaıda POS-termınal paıdalanylmaǵan, al 119 kásipkerdiń lıtsenzııasyz alkogol ónimderin satqany anyqtaldy, – dedi Sáýle Shyrynbekova.
Buǵan deıin Túrkistan oblysyndaǵy «Qaplanbek» ótkizý beketinde janjal týyp, polıtsııa is qozǵaǵanyn jazǵan edik.
