Túrkistan oblysynda 114 myń gektar jerge sý únemdeý tehnologııalary engizildi
ASTANA. KAZINFORM — Túrkistan oblysynda sý únemdeý tehnologııalary engizilip, 4 sý qoımasy salynady. Bul týraly oblys ákimi Nuralhan Kósherov eseptik kezdesýinde aıtty.
Ákim el boıynsha aǵyn sý tapshylyǵy sezilip jatqanyn atap ótti. Osyǵan oraı, Memleket basshysy eń aldymen sýdy únemdeıtin ozyq tehnologııany engizý isin tezdetýdi tapsyrǵan bolatyn.
— Sý únemdeý tehnologııasy aǵyn sýdy 2 ese únemdep, ónimdilikti 3 esege arttyrady. Elimizdegi sýarmaly jerlerdiń tórtten biri oblysymyzǵa tıesili. Onyń jalpy alańy 554 myń gektardy quraıdy. 2025 jylǵa deıin sý únemdeý tehnologııasy 55 myń gektarǵa engizildi. Bıyl qosymsha 59 myń gektar jerde sý únemdeý tehnologııasy paıdalanylyp, jalpy kólemi 114 myń gektarǵa jetkizilmek, — dedi N. Kósherov elordada Ortalyq kommýnıkatsııalar qyzmetinde ótken brıfıngte.
Aldaǵy 5 jylda sý únemdeý tehnologııasyn qosymsha 250 myń gektarǵa engizý josparlanyp otyr. Sýarý tehnologııalarynyń qol jetimdiligin arttyrý baǵytynda 4 kásiporyn iske qosyldy, taǵy ekeýi kelesi jyly ashylady. Nátıjesinde, 148 myń gektarǵa sý únemdeý tehnologııasymen qamtamasyz etý múmkin bolady.
— Nátıjesinde, 364 myń gektarǵa sý únemdeý tehnologııasymen qamtamasyz etý múmkin bolady. Osy kásiporyndar esebinen oblys jáne kórshiles óńirler sý únemdeý tehnologııalarymen tolyq qamtamasyz etiledi. Otyrar aýdanynda sý únemdeý tehnologııasyn qoldanyp, «Kúrish daqylyn egý» jobasy iske asyryldy. Joba quny 7 mln dollarǵa jetedi. Qarapaıym ádispen gektaryna aǵyn sý 26 myń tekshe metrge deıin paıdalanylsa, tamshylatyp sýarý esebinen aǵyn sý 2 ese únemdelgen, — dedi óńir ákimi.
Oblys aýmaǵynda aǵyn sýmen qamtamasyz etetin jalpy uzyndyǵy 12 731 shaqyrymdy quraıtyn kanaldar bar, olardyń 76%-nyń tozyǵy jetken.
— Birinshi kezekte tozyǵy jetken sý nysandaryn qalpyna keltirýimiz qajet. Islam Damý bankiniń qarajatyna 302 sý nysanyn jóndeýdi josparlap otyrmyz. Nátıjesinde, kanaldardyń tozý kórsetkishi 50 paıyzǵa deıin tómendeıdi, — dep túsindirdi N. Kósherov.
Budan bólek, syıymdylyǵy 121 mln tekshe metr 4 sý qoımasyn salý josparlanǵan. Onyń ishinde, «Báıdibek ata» jáne «Qaraqýys» sý qoımalary salynyp jatyr, «Boraldaı» jáne «Iqan sý» qoımalarynyń jobasy ázirlenýde.
— «Báıdibek ata» jáne «Boraldaı» sý qoımalaryn salý esebinen Túrkistan qalasy jáne 5 aýdan turaqty 120 mln tekshe metr sýmen qamtylmaq. Nátıjesinde, 18 myń gektarǵa jýyq jerdiń sýmen qamtamasyz etýi jaqsarady. Bul qosymsha 200 mlrd teńgege ónimin óndirýge múmkindik beredi, — deıdi Túrkistan oblysynyń ákimi.
Aıta keteıik, Túrkistan oblysynda geografııalyq jáne klımattyq erekshelikterge saı úsh negizgi klaster — maqta-toqyma, júgeri, jáne et baǵyttary qarqyndy damyp keledi.
Sondaı-aq, Túrkistan oblysynda beınekamera, medıtsınalyq jıhaz, turmystyq hımııalyq buıymdar shyǵarylmaq.