Túrkistan oblysynda 113 myńnan asa azamat turǵyn úı kezeginde tur
TÚRKІSTAN. KAZINFORM — 2025 jyldyń 24 mamyrynan bastap Qazaqstanda turǵyn úı kezegin júrgizý júıesi ózgerip, bul qyzmet tolyqtaı «Otbasy bankke» berildi. Osyǵan baılanysty Túrkistan oblysynda myńdaǵan azamat derekterin qaıta rásimdeýi tıis.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Toqtar Ýsýbalıevtiń aıtýynsha, búginde óńirde turǵyn úı kezegine tirkelgen azamattar sany 113 536-ǵa jetken.
— Bul — respýblıka boıynsha kezekte turǵandardyń 11,1 paıyzy. Kezekte turǵandardyń basym bóligi Túrkistan qalasy, Saryaǵash jáne Tólebı aýdandaryna tıesili, — dedi ol.
2025 jyldyń 24 mamyrynan bastap turǵyn úı saıasatyna engizilgen reformalarǵa sáıkes turǵyn úı kezegi «Otbasy bank» aktsıonerlik qoǵamyna ótkizildi. Endi turǵyn úıge qatysty máseleler men ótinishter osy bank arqyly retteledi.
Jańa talapqa sáıkes, kezekte turǵan árbir azamat «Turǵyn úımen qamtamasyz etý ortalyǵy» aqparattyq júıesindegi jeke kabınetine kirip, derekterin óńdeýge kelisim berýi tıis.
Oblys boıynsha túgendeýden ótýi qajet 69 119 azamattyń 33 028-i nemese 47,8 paıyzy rásimdelgen. Arys qalasy men Tólebı, Ordabasy, Otyrar aýdandarynda bul kórsetkish tómen deńgeıde qalyp otyr. Sońǵy aıda Arys qalasynda — 195, Ordabasy aýdanynda — 188, Sozaq aýdanynda 54 azamat túgendeýden ótken.
«Otbasy banktiń» Túrkistan oblystyq fılıaly tóraǵasynyń orynbasary Dáýren Myrzataevtyń aıtýynsha, 2025 jyldyń 24 mamyrynan bastap turǵyn úı kezegin úılestirý, tirkeý jumystary bank quziretine berilgen. Turǵyn úıge muqtaj azamattar orken.otbasybank portaly arqyly onlaın formatta esepke qoıylyp, arendalyq jáne kredıttik úıler boıynsha ótinish beredi.
— Bank turǵyn úıge muqtaj azamattardyń tsıfrlyq portretin qalyptastyrady jáne olardyń áleýmettik sanatyna, otbasy tabysyna qaraı turǵyn úı máselesin sheshý quraldaryn usynady. Turǵyn úıge muqtaj jan retinde esepke turý úshin sońǵy 5 jyl ishinde menshik quqyǵynda turǵyn úıi joq, kámelettik jasqa tolǵan qazaqstandyqtar ótinish bere alady. Birinshi kezekte jetim balalarǵa, ata-anasynyń qamqorlyǵynsyz qalǵan balalarǵa, kópbalaly otbasylarǵa, múgedek balalary bar otbasylarǵa jáne ózge de sanattarǵa basymdyq beriledi, — dedi ol.
Oblystaǵy kezek rettiligine kelsek, kópbalaly otbasylar (31 830 azamat nemese 28%) jáne І, ІІ top múgedektigi bar adamdardyń (8 030 azamat nemese 7,1%) úlesi joǵary. Sonymen qatar jetim balalar men ata-anasynyń qamqorlyǵynsyz qalǵandar — 1 990, múgedek balalary bar otbasylar — 3 139, jeńildikter boıynsha UOS ardagerlerine teńestirilgender — 45, jesirler — 390, basqa memleketterdiń aýmaǵyndaǵy urys qımyldarynyń ardagerleri — 61.
Sonymen qatar, oblysta 1 953 otbasy jaldaý aqysyn sýbsıdııalaý sharasymen qamtylǵan. 2026 jylǵa bul maqsatqa oblystyq bıýdjetten 500 mln teńge qaralǵan. 2023-2025 jyldary júrgizilgen monıtorıng nátıjesinde 6041 azamattyń ótinimi zańbuzýshylyqtarǵa baılanysty toqtatyldy.
Budan buryn Túrkistan qalasynda 95 350 azamat jer telimin alý úshin kezekte turǵanyn jazǵan edik.