Túrkistan oblysynda 1100 tonna qaýyn men qarbyz jınaldy
ASTANA. KAZINFORM — Túrkistan oblysynyń fermerleri bıylǵy baqsha daqyldarynyń alǵashqy ónimin ala bastady. Búgingi kúnge deıin 600 tonna qarbyz jáne 500 tonna qaýyn jınaldy. Bul týraly AShM málim etti.
Túrkistan oblysy baý-baqsha jaǵynan eldegi aldyńǵy qatarly aımaqtardyń biri. Bıyl qarbyz egis alqaby 20 myń gektar, al qaýyn alqaby 42 myń gektar boldy. Aýa raıynyń qolaılylyǵynyń, zamanaýı agrotehnologııalardy qoldaný jáne aýyl sharýashylyǵy taýar óndirýshileriniń kásibıliginiń arqasynda erte ári sapaly ónim alyndy.
— Baqsha daqyldary egilgen alqaptardyń kóp bóligi Jetisaı aýdanynda. Bıyl munda 80 myń gektar sýarmaly jerge egin egildi, onyń 17,1 myń gektaryn baqsha daqyldary alyp jatyr. Jańa ónimniń alǵashqy legi Qazaqstannyń iri qalalaryna jóneltildi. Sonymen qatar Reseı Federatsııasyna eksporttaý bastaldy, — delingen habarlamada.
Aldaǵy aptalarda jınaý jumystarynyń qarqyny arta túspek. Óndiris kóleminiń ulǵaıýy ishki naryqty otandyq baqsha ónimderimen tolyq qamtamasyz etýge, sondaı-aq eksporttyq tasymaldardy keńeıtýge múmkindik beredi dep kútiledi.
Óńirde ónim jınaý jumystary jalǵasyp jatyr. Túrkistandyq sharýalar baqsha daqyldary boıynsha, oblys kóleminde ishki jáne syrtqy naryqtarǵa aýyl sharýashylyǵy ónimderin jetkizýshi negizgi óńirlerdiń biri retinde ornyn odan ári nyǵaıtýdy kózdep otyr.
Buǵan deıin Túrkistan oblysynda qarbyz alqabynan alǵashqy ónim jınala bastaǵanyn jazdyq.
