Túrkistan oblysynda 1,1 mlrd teńgeden astam qarajat bızneske qaıtaryldy
TÚRKІSTAN. KAZINFORM – Túrkistan oblysy kásipkerler palatasy 2025 jyly kásipkerlerdiń quqyqtaryn qorǵaý, ákimshilik kedergilerdi joıý jáne sybaılas jemqorlyqqa qarsy is-qımyl baǵytyndaǵy jumystarynyń nátıjesin jarııalady.
Vedomstvonyń málimetinshe, 2025 jyly kásipkerlerden 170 ótinish túsken, onyń 66-sy eOtinish júıesi arqyly joldanǵan. Nátıjesinde 81 ótinish (48%) kásipkerlerdiń paıdasyna sheshilgen. Sonymen qatar memlekettik organdarǵa 580 resmı suranym joldanyp, Palata ókilderiniń qatysýymen 34 sot isi ótken.
– 2025 jyldyń I jartyjyldyǵynda memlekettik satyp alýdyń josparsyz qatysýshylary tiziliminen shyǵarý maqsatynda qurylǵan kelisim komıssııasynyń quramyna Palata ókilderi engizildi. Nátıjesinde 5 kásipker – («Bekarysstroı» JShS, «DanAia» JShS, «KAZ ELIT STROY» JShS, «Forum Stroy» JShS jáne «Farab street» JShS) atalǵan tizimnen shyǵaryldy. Sondaı-aq Túrkistan qalalyq mádenıet úıine qatysty memlekettik satyp alýda daýly jaǵdaı týyndady. Kásipkerlermen jalpy somasy 177 129 500 teńgege kelisimsharttar jasalǵanymen, tapsyrys berýshi tólem mindettemelerin oryndamaǵan. Atalǵan másele Keńes otyrysynda qaralyp, jaýapty laýazymdy tulǵa tártiptik jaýapkershilikke tartyldy. Nátıjesinde kásipkerler aldyndaǵy bereshek tolyq ótelip, olardyń múliktik quqyqtary qalpyna keltirildi, - dep habarlady oblystyq kásipkerler palatasy.
Budan bólek, kásipkerlik sýbektilerinen túsken 34 ótinish boıynsha Palata qyzmetkerleri sot protsesterine ókil retinde qatysty. Onda qaralǵan 15 is boıynsha kásipkerlerdiń 432 mln teńgeden astam qarjylyq múddesi qorǵaldy.
– Jalpy 2025 jyly kásipkerlerdiń 1,1 mlrd teńgeden astam somaǵa múliktik quqyqtary qorǵaldy. Onyń ishinde 711 mln teńgeden asa kólemde zalal ótelip, negizsiz shyǵyndardyń aldyn alý qamtamasyz etildi. Sonymen qatar 432 mln teńgeden asa qarjy sot arqyly qorǵalsa, 177 mln teńgeden astam bereshek memlekettik organ tarapynan tolyq óteldi, - dep málimdedi vedomstvo ókilderi.
Budan buryn Túrkistan oblysynda 166 mln teńge qaryzy bar 21 boryshker qumar oıynǵa aqsha salǵanyn jazǵan edik.