Túrkistan oblysynda 100 keliden astam nasybaı ónimi tárkilendi

TÚRKІSTAN. KAZINFORM- Tártip saqshylary adam densaýlyǵyna zııandy qorqor, elektrondy temeki jáne nasybaı ónimderine qatysty reıd júrgizip jatyr.

Túrkistan oblysynda 10 kún ishinde nasybaı satqan 202 adam anyqtaldy. Olarǵa tyıym salynǵan taýarlarmen nemese ózge de zattarmen zańsyz saýda jasaý boıynsha hattama toltyryldy. Jalpy reıd barysynda polıtsııa qyzmetkerleri 100 keliden astam nasybaı ónimin tárkiledi. 

«Memleket basshysy Qasym-Jomart Toqaev Ulttyq quryltaıdyń úshinshi otyrysy barysynda elde nasybaı atatyndarǵa qatysty alańdaýshylyq bildirip, onyń densaýlyqqa zııan jáne uıat ádetterdiń biri ekenin atap ótken bolatyn. Prezıdent tapsyrmasyn oryndaý maqsatynda QR ІІM-men reıd jumystary júrgizilýde», - delingen Túrkistan oblysy polıtsııa departamentiniń baspasóz qyzmeti usynǵan aqparatta.