Túrkistan oblysynda 100-den astam qoqys polıgony talapqa saı kelmeıdi

TÚRKІSTAN. KAZINFORM - Óńirdegi 800-den astam eldi mekenniń 43 paıyzy ǵana qoqys shyǵarý qyzmetimen qamtylǵan. Bul týraly Túrkistan oblysynyń ákimi Darhan Satybaldy tóraǵalyǵymen ótken jıynda aıtyldy.

Túrkistan oblystyq tabıǵı resýrstar jáne tabıǵat paıdalanýdy retteý basqarmasynyń basshysy Qaırat Abdýalıevtiń sózine súıensek, óńirdegi 800-den astam eldi mekenniń 43 paıyzy ǵana qoqys shyǵarýmen qamtylǵan.

Bul baǵytta oblys boıynsha 58 mekeme 247 tehnıkamen qyzmet kórsetedi.

Mınıstrliktiń tapsyrmasyna sáıkes, tehnıkaǵa GPS júıesin ornatyp, qoqys kólikteriniń qozǵalysy týraly aqparat «Tabıǵı resýrstar jáne qorshaǵan ortanyń jaǵdaıy týraly ulttyq bank» qoryna túsýin qamtamasyz etý tapsyrylǵan.

Ázirge, atalǵan júıe tek, Túrkistan, Kentaý qalalaryndaǵy mekemelerde ǵana júzege asyp otyr.

Al basqa aýdandarda jumystar áli kúnge deıin júrgizilmegen. 

Al, aýdan, qala aýmaǵynda 151 qatty turmystyq polıgon orny belgilense, onyń 107-i sanıtarlyq-ekologııalyq normaǵa sáıkes kelmeıdi.

Eldi mekenderdegi zańsyz kúltókpelerdi joıý jáne atalǵan salany ońtaılandyrý maqsatynda ótken jıynda Túrkistan oblysynyń ákimi Darhan Satybaldy jaýaptylarǵa naqty mindet júktedi. 

«Bul máselege qatysty birneshe túıtkil bar. Alaıda ony 3 jylda túbegeıli sheshý kerek. Aýdandardy aralap, halyqpen kezdesýler ótkizgen kezde retsiz qoqys týraly shaǵymdy jıi estımiz. Bul jaǵdaıdy kúrdelendirip otyrǵan myna ózderińiz. Qolmen isteýge bolatyn tirlikti uıymdastyrý, ony júıeli túrde júzege asyrý arqyly tazalyqty saqtaýǵa bolady. Bilmeseńizder, úırenińizder. Aınalayzǵa qarap, surastyryńyzdar. Tazalyqqa ár ákim jeke jaýapty», - dedi Darhan Satybaldy.