Túrkistan oblysynda 100-den asa eldi mekenniń bas josparyna túzetý engiziledi

TÚRKІSTAN. KAZINFORM-Óńirde jalpy 801 eldi meken bar.

Búgingi tańda Túrkistan oblysy aýmaqtarynyń qala qurylysyn josparlaýdyń keshendi syzbasy ázirlenip, saraptamaǵa joldanǵan. Jyl sońyna deıin oblys máslıhatmen bekitilmek. 

Túrkistan oblysy sáýlet jáne qala qurylysy basqarmasynyń basshysy Nurlyjan Býkebaevtiń málimdeýinshe, oblysta ornalasqan eldi mekenderde taldaý jumystary júrgizilip, nátıjesinde 387 sapasyz bas jospar anyqtalǵan. Osy tusta bas josparlarǵa túzetý engizý úshin oblys ákimdigimen 2025-2029 jylǵa arnalǵan jol kartasy bekitildi.

Sonymen qatar 105 eldi mekenniń bas josparyna túzetý engizý jumystary 2025-2026 jyldar aralyǵynda júzege aspaq. Búginde 30 eldi mekenge oblystyq bıýdjetten tıisti qarjy qaralyp, kestege saı jumys júrgizilip jatyr.

Al aýdan, qala boıynsha 75 eldi mekenniń bas josparyna túzetý sharalary engizilmek. Ótken jylǵy kestege saı 37 eldi mekenniń bas jospary ázirlengen.

Qazirgi ýaqytta 3 eldi mekenniń, ıaǵnı Birkólik, Saryaǵash jáne Jibek jolynyń bas josparyn retteý jobalary ázirlenip jatyr. 

Búginde Túrkistan oblysy boıynsha 7 qalanyń bas jospary 71%-ǵa jáne 32 egjeı-tegjeıli josparlaý jobalary 52%-ǵa tsıfrlandyrylyp, qurylys bazasyna engizilip jatyr.

Al, Túrkistan, Kentaý, Lengir, Shardara, Saryaǵash qalalarynyń bas josparlary qurylys bazasyna engizilgen. Arys, Jetisaı qalalarynyń bas josparlaryn tsıfrlandyrylý sharalary da qolǵa alynǵan. 

Aıta keteıik, budan buryn Baıqońyrda qurylysy aıaqsyz qalǵan 5 turǵyn úıdiń merdigeri aýysqanyn jazǵan bolatynbyz.