Túrkistan oblysynda 1 mln gektar jer memleketke qaıtaryldy

TÚRKІSTAN. KAZINFORM – Óńirde aýyl sharýashylyǵy maqsatyndaǵy jerlerdi memleketke qaıtarý eki baǵytta júzege asyp jatyr.

Túrkistan oblysynda sońǵy úsh jylda 1 mıllıon gektarǵa jýyq jer memleket menshigine qaıtaryldy. Atap aıtqanda, 2022 jyly 520 myń gektardan astam, 2023 jyly 330 myń gektardan astam, al 2024 jyldyń ózinde 70 myń gektardan astam aýyl sharýashylyǵy maqsatyndaǵy jer qaıtarylǵan. Bıyl jyl sońyna deıin qosymsha 110 myń gektar jer ýchaskesin memleketke qaıtarý josparlanyp otyr. Búgingi kúnge onyń 60,1 myń gektary qaıtaryldy. Bul jerler kezinde aýyl sharýashylyǵy maqsatynda jeke tulǵalarǵa berilgenimen, jyldar boıy paıdalanylmaı kelgen.

Oblystyq Jer qatynastary basqarmasynyń basshysy Erǵalı Tilegenniń aıtýynsha, óńirdiń jalpy jer qory – 11 mln 610,3 myń gektar. Qazir paıdalanylmaı jatqan aýyl sharýashylyǵy maqsatyndaǵy jerlerdi jáne Qazaqstan Respýblıkasynyń zańnamasyn buza otyryp paıdalanylyp jatqan jer telimderin memleket menshigine qaıtarý maqsatynda oblys ákiminiń ókimimen vedomstvoaralyq jumys toby qurylǵan.

- Túrkistan oblysy boıynsha aýyl sharýashylyǵy maqsatyndaǵy jerlerdi memleketke qaıtarý eki baǵytta júzege asyrylyp jatyr. Birinshi baǵyt – Aýyl sharýashylyǵy mınıstrligi bekitken jospar aıasynda júrgizilse, ekinshi baǵyt jumys toby anyqtaǵan ortaq jaıylymdardy qaıtarý jospary boıynsha iske asyp keledi. Qazir Jer resýrstaryn basqarý departamenti tarapynan 403 jer paıdalanýshyǵa tıesili 124,3 myń gektar jaıylym jerge qatysty qujattar qaralyp, nusqamalar joldanyp jatyr. Sonymen qatar aýdan jáne qala ákimdikteri bekitken josparlar aýyldyq okrýgter kesindisinde ázirlenip, bekitilgen, - delingen Túrkistan oblysy ákimdigi taratqan aqparatta.

Aıta keteıik, budan buryn Túrkistan oblysynda ortalyqtandyrylǵan jylý jelileriniń 49 paıyzy tozǵanyn jazǵan bolatynbyz.