Túrkistan oblysynda 1 mıllıonnan astam turǵyndy aýyzsýmen qamtıtyn sý qubyry salynady
ASTANA. KAZINFORM – Túrkistan oblysynda bes aýdannyń turǵyndaryn sapaly aýyzsýmen qamtamasyz etetin magıstraldyq sý qubyry men qýaty 72 MVt bolatyn sý elektr stantsııalarynyń kaskady salynady, dep habarlaıdy Sý resýrstary jáne ırrıgatsııa mınıstrligi.
Memleket basshysynyń Joldaýyn iske asyrý aıasynda mınıstrlik pen «South Hydro Power» JShS tıisti kelisimge qol qoıdy.
Joba júzege asyrylǵannan keıin Qazyǵurt, Saryaǵash, Keles, Maqtaaral jáne Jetisaı aýdandaryndaǵy 1 mıllıonnan astam turǵyn sapaly aýyzsýmen qamtamasyz etiledi.
Sonymen qatar sý elektr stantsııalarynyń kaskady óńirdegi energııa tapshylyǵyn azaıtýǵa yqpal etedi. Jobada qýaty 72 MVt bolatyn jańartylatyn energııa kózderin paıdalaný kózdelgen.
– Búgin biz mańyzdy strategııalyq qujatqa qol qoıdyq. Bul jobany iske asyrý halyqtyń ómir súrý sapasyn arttyrýǵa jáne Túrkistan oblysynyń damýyna eleýli úles qosady. Qosymsha energetıkalyq qýat Memleket basshysynyń Qazaqstan halqyna Joldaýynda bergen tapsyrmalaryn ekologııaǵa zııan keltirmeı, tıimdi oryndaýǵa múmkindik beredi, – dedi Sý resýrstary jáne ırrıgatsııa mınıstri Nurjan Nurjigitov.
Kelisimde nysannyń tıimdi jumys isteýi úshin qajetti sý tutyný kólemi, ınvestıtsııalyq kezeńi jáne paıdalaný merzimderi belgilengen.
Joba aıasynda uzyndyǵy 54,7 shaqyrym bolatyn magıstraldyq sý qubyry salynady. Keıin bul nysan memleket menshigine óteýsiz beriledi.
Sý qubyry men sý elektr stantsııalarynyń kaskady Qazaqstannyń strategııalyq sý nysandary tizimine engizilgen.
Mınıstrlik málimetinshe, qurylys barysynda paıdalanylatyn otandyq ónimderdiń úlesi 90 paıyzdy quraıdy.
Aıta keteıik, buǵan deıin Túrkistan oblysyndaǵy Ógem ózeninde sý elektr stantsııalarynyń kaskady bar toptyq sý qubyryn salýǵa 191,7 mlrd teńge ınvestıtsııa tartý josparlanyp otyrǵany habarlanǵan edi.
