Túrkistan oblysynda 1 000-ǵa jýyq adamdy jumyspen qamtıtyn zaýyt qurylysy bastaldy
TÚRKІSTAN. KAZINFORM – Túrkistan oblysy, Túlkibas aýdanynda «Sastóbe» ınnovatsııalyq kesheni» JShS iri zaýytynyń qurylysy bastaldy.
Quny 180 mlrd teńgeni zaýytta kaýstıkalyq soda, polıvınılhlorıd, tsement, ák jáne kaltsıı karbıdi óndiriledi. Túrkistan oblysynyń ákimi zaýyttyń qurylys alańynda bolyp, ınvestormen kezdesti. Ol óz kezeginde ıgilikti bastamaǵa sáttilik tiledi.
– Búgin biz elimiz úshin asa mańyzdy óndiristik jobalardyń biri – «Sastóbe ınnovatsııalyq kesheniniń» birinshi kezeńiniń qondyrǵylardy ornatý jumystaryn bastaý sátiniń kýási bolyp otyrmyz. «Saýts-Oıl» kompanııasy qolǵa alyp otyrǵan bul keshen iske qosylǵanda Qazaqstandaǵy eń iri ák óndirýshi bolady. Atalǵan óndiris ishki naryqty sapaly ónimmen qamtamasyz etýge ǵana emes, eksporttyq áleýetimizdi de aıtarlyqtaı arttyrýǵa múmkindik beredi. Investorlarǵa alǵysymyzdy bildiremiz. Joba sátti júzege asyp, turǵyndar jumyspen qamtyla bersin, - dedi Nuralhan Kósherov.
Túlkibas aýdany aýmaǵyndaǵy «Sastóbe» ınnovatsııalyq kesheni» JShS jobasyna «2021-2025 jyldarǵa arnalǵan kásipkerlikti damytý jónindegi» ulttyq jobasy aıasynda qoldaý kórsetilip, jobalaý-smetalyq qujattamalary ázirlengen. Respýblıkalyq bıýdjetten ınfraqurylym júıeleriniń qurylysyna qarjy bólindi. 2026 jyly iske qosylatyn zaýytta jylyna 400 myń tonna ák, 200 myń tonna kaltsıı karbıdin, 100 myń tonna kaýstıkalyq soda, 120 myń tonna polıvınılhlorıd (PVH) jáne 1 mln tonna tsement óndirilmek. Sondaı-aq 1 000-ǵa jýyq jumys orny ashylady.
Ónimderin elimizben qatar shetelge eksporttaý josparlanyp otyr. Búginde respýblıka aýmaǵy boıynsha bundaı óndiris orny joq. Jobada ekologııalyq taza, zamanaýı óndiristik tehnologııalar qoldanylady.
Qazirgi tańda shetelden 100% ımporttalyp otyrǵan PVH jáne kaltsıı karbıdi endi óz elimizde óndiriler kún jaqyn jaqyn. Bul joba qurylys, hımııa, metallýrgııa sekildi ónerkásiptiń kóptegen salasyna serpin bereri anyq.
Eske salaıyq, buǵan deıin Túrkistan-Kentaý avtojoly 4 jolaqqa keńeıtilýi múmkin ekenin jazǵan edik.