Túrkistan oblysynan Almatyǵa qaraı barlyq kólik túrleriniń qozǵalysy shekteldi
TÚRKІSTAN. KAZINFORM – Túrkistan oblysynda aýa raıynyń qolaısyzdyǵyna baılanysty Almaty baǵytynda barlyq kólik túrleriniń qozǵalysyna shekteý qoıyldy.
Oblystyq polıtsııa departamentiniń málimetinshe, óńir polıtseıleri kúsheıtilgen rejımde táýlik boıy qyzmet atqaryp jatyr.
Tártip saqshylary júrgizýshilerge jol qozǵalysy erejelerin saqtaý jóninde túsindirý jumystaryn júrgizip, jol shetine shyǵyp ketken avtokólikterge kómek kórsetip jatyr.
– Kórshiles oblystarda qalyń qar jaýyp, respýblıkalyq mańyzy bar avtojoldarda kólik qozǵalysy qıyndaýyna baılanysty Shymkent baǵytynan Taraz jáne Almaty qalalaryna qaraı barlyq kólik túrleriniń qozǵalysyna ýaqytsha shekteý engizildi, – delingen habarlamada.
Polıtsııa ókilderi óńir turǵyndary men qonaqtaryn jol erejelerin qatań saqtaýǵa, alys jolǵa shyqpaýǵa jáne jolda barynsha muqııat bolýǵa shaqyrdy.
Budan buryn 12 aqpanda qolaısyz aýa raıyna baılanysty respýblıkalyq mańyzy bar birqatar avtojol ýchaskelerinde qozǵalys shektelgenin jazǵan edik.