Túrkistan oblysynan 4500 jýyq jas áskerge barady

TÚRKІSTAN. KAZINFORM - Óńirdegi árbir aýdan, qalada áskerı-patrıottyq jáne de áskerı eriktiler klýby  qurylady.

Áskerge jiberilýshi jastardyń 2255-i kóktemgi, al 2245-i kúzgi maýsymǵa shaqyrtylady dep josparlanyp otyr. Búgingi kúni bul baǵytta daıyndyq jumystary qarqyndy júrgizilip jatyr. Búgin Túrkistan oblysy ákimdiginde 2024 jylǵy áskerge shaqyrý naýqanyna daıyndyq máseleleri boıynsha jıyn ótti.

Kún tártibinde kóktemgi áskerge shaqyrý naýqanyna daıyndyq jumystarynyń barysy, jastardy áskerı-patrıottyq baǵytta tárbıeleý jumysynyń tıimdiligi jáne aldaǵy josparlar talqylandy. Qarýly kúshter men basqa da áskerı quralymdardyń ókilderi óz bólimderine áskerge shaqyrylýshylardy irikteý tártibi men olardy jasaqtaý máseleleri týraly baıandady. Jumysty nashar uıymdastyrǵan aýdan, qalalardaǵy jaýapty tulǵalarǵa tıisti tapsyrmalar berildi. Áskerı boryshyn óteýden jaltaryp júrgen jastar máselesi de sóz boldy.

«Keıbir jastardyń Qarýly kúshter qataryna barǵysy kelmeýiniń sebebin anyqtaý úshin zertteý jumystaryn tezdetip júrgizý qajet. Oblystaǵy mektepterde «Jas sarbaz» áskerı úıirme synyptaryn ashýdy qolǵa alǵan jón. Bıyl óńirde áskerı-patrıottyq baǵyttaǵy is-sharalar sanyn kóbeıtip, úgit-nasıhat jumystaryn jandandyrý kerek. Barlyq aýdan-qalada áskerı-patrıottyq jáne de áskerı eriktiler klýbyn qurý qajet», – dedi oblys ákiminiń orynbasary Beısen Tájibaev.