Túrkistan oblysynan 2500-ge jýyq azamat kúzgi áskerge attanady
TÚRKІSTAN. KAZINFORM — Bıylǵy jyldyń qyrkúıeginen jeltoqsan aıyna deıin 2500-ge jýyq jas sarbaz Otan aldyndaǵy áskerı boryshyn óteýge shaqyrylady.
Ásker qataryna alynǵan azamattar Qazaqstan Respýblıkasy Qorǵanys mınıstrliginiń Qarýly kúshterinde, Ulttyq qaýipsizdik komıtetiniń Shekara qyzmetinde, Ulttyq ulanda, Memlekettik kúzet qyzmetinde jáne Tótenshe jaǵdaılar mınıstrliginiń qurylymdarynda qyzmet etedi.
— Kúzgi shaqyrý naýqanyna Túrkistan oblysynan QR Qarýly Kúshterine — 1000-ǵa jýyq sarbaz, QR Ulttyq qaýipsizdik komıtetiniń Shekara qyzmetine — 350-den astam jas, QR Memlekettik kúzet qyzmetine — 35 sarbaz, QR Ulttyq ulanyna — 900-den asa adam, QR Tótenshe jaǵdaılar mınıstrliginiń qurylymdaryna — 30 azamat jiberiledi. Bıylǵy jyldyń shilde jáne tamyz aılarynan bastap shaqyrylýshylarmen aldyn ala zerdeleý jumystary júrgizildi. Árbir shaqyrylýshynyń densaýlyǵy, bilimi jáne moraldyq-psıhologııalyq jaǵdaıy eskerilip, olar Qarýly Kúshterdiń, basqa da áskerler men áskerı qurylymdardyń qajettilikterine qaraı taǵaıyndaldy-dedi Túrkistan oblysynyń Qorǵanys isteri jónindegi departamenti bastyǵynyń orynbasary Jandos Kúlderbaev.
Al QR UQK Túrkistan oblysy departamentiniń aǵa ofıtseri Erbolat Bazarqulov áskerden keıingi jeńildikterge toqtaldy. Onyń aıtýynsha, Otan aldyndaǵy boryshyn ótegen azamattarǵa memleket tarapynan qoldaý kórsetiledi.
Elimizdiń azamattary áskerı qyzmetten keıin eki jyl ishinde UBT nátıjesinsiz áńgimelesý arqyly aqyly negizde JOO-ǵa túsý múmkindigi bar. Úzdik áskerı qyzmetshilerge memlekettik grant negizinde tegin joǵary bilim alý múmkindigi qarastyrylǵan. Emtıhansyz grant negizinde JOO-nyń áskerı kafedrasyna túsý, sonymen qatar úzdik áskerı qyzmetshilerge QR Qorǵanys mınıstrliginiń áskerı oqý oryndaryna UBT nátıjesinsiz túsý múmkindigi berilgen. Áskerge shaqyrý naýqany ashyq formatta júrgiziledi. Qajetti aqparat alý úshin árbir azamat qorǵanys isteri jónindegi departamentke, basqarmalar men bólimderge júgine alady - dedi Erbolat Bazarqulov.
Aıta keteıik, budan buryn Túrkistan oblysynda qarjylyq pıramıda qurǵandar sottalǵanyn jazǵan bolatynbyz.