Túrkistan oblysynan 1600-den astam adam jumys kúshi jetispeıtin óńirlerge kóship bardy
TÚRKІSTAN. KAZINFORM — Ótken jyly Túrkistannan kósh túzegen azamattardyń basym bóligi Soltústik Qazaqstan oblysyn tańdaǵan. Bul óńirge 241 otbasy, ıaǵnı 971 adam qonystandy.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, 2025 jyly «Jumys kúshiniń utqyrlyǵyn arttyrý úshin erikti túrde qonys aýdarý» baǵdarlamasy aıasynda respýblıka boıynsha 7344 kvota bólingen.
Atalǵan baǵdarlama sheńberinde Túrkistan oblysynan 407 otbasy, ıaǵnı 1 634 adam elimizdiń jumys kúshi jetispeıtin 7 oblysyna qonys aýdarǵan.
— Ótken jyly Túrkistannan kósh túzegen azamattardyń basym bóligi Soltústik Qazaqstan oblysyn tańdaǵan. Bul óńirge 241 otbasy, ıaǵnı 971 adam qonystandy. Sondaı-aq Qostanaı oblysyna — 29 otbasy, 128 adam, ShQO — 25 otbasy, 93 adam jáne Pavlodar oblysyna 93 otbasy, 372 adam kóship bardy. Budan bólek, Abaı oblysyna — 9 otbasy, 29 adam, Qaraǵandy — 4 otbasy, 19 adam jáne Ulytaý oblysyna 6 otbasy, 22 adam turaqtady, — delingen vedomstvonyń usynǵan aqparatynda.
Al bıyl respýblıka boıynsha 5997 kvota bólinip, qonys aýdarýshylar úshin memlekettik qoldaý kórsetetin 7 oblys belgilendi. Onyń qatarynda Abaı, Qaraǵandy, Qostanaı, Pavlodar, Soltústik Qazaqstan, Ulytaý, Shyǵys Qazaqstan oblystary bar.
Eske salsaq, qazirgi tańda Túrkistan oblysynda 40 myńǵa jýyq jumyssyz adam tirkelgen.
Budan buryn Túrkistan oblysynda jumyssyzdyqpen kúres qalaı júrip jatqanyn jazǵan edik.
Aıda Balaeva Kóshi-qon saıasaty tujyrymdamasynyń negizgi erejelerin túsindirdi.