Túrkistan oblysyna 700 myń tonnadan astam kómir qajet

TÚRKІSTAN. KAZINFORM – Búgingi tańda tuıyqtarda 138 myń tonna kómir jınaqtalǵan. 1 tonna kómir 19 850 – 22 000 teńge aralyǵynda satylyp jatyr.

Bul týraly Túrkistan oblystyq energetıka jáne turǵyn úı-kommýnaldyq sharýashylyq basqarmasynyń basshysy Rýslan Muzdybekov málimdedi.

Túrkistan oblysy boıynsha aldaǵy jylytý maýsymyna daıyndyq is-sharalary kestege sáıkes júrgizilip jatyr. Óńirlik shtab jylytý maýsymyn turaqty baqylaýǵa alǵan.

«Jalpy oblystyń kómir otynyna qajettiligi 700,9 myń tonnany quraıdy. «QTJ» AQ aqparatyna sáıkes oblysqa 189,8 myń tonna kirgizilgen (27,1%). Ordabasy, Báıdibek, Qazyǵurt, Saıram aýdandary kómirdi Shymkent qoımalarynan tasymaldaıdy. Turǵyndar úshin qajetti kómir kólemi 318 myń tonna. Ázirge 49 paıyzy qamtamasyz etildi. Budan bólek, oblystyń jylyjaılary úshin 282,9 tonna kómir qajet. Jylyjaı ıeleri «Shubarkól» AQ-men tikeleı kelisimshartqa turǵan. Ázirge 20,3 myń tonna jetkizildi. Bıýdjettik mekemeler úshin 99,8 myń tonna kómir satyp alý josparlanǵan. Búgingi kúnge 91 paıyzy jetkizilip otyr. Tasymaldaý jumystary turaqty jalǵasýda» - dedi Rýslan Muzdybekov.

Kommýnaldyq-turmystyq kómir tasymaldaýmen oblysta 23 óńirlik operatorlar aınalysady. QR Energetıka mınıstrligi tarapynan oblysqa qajetti 7,8 myń tonna áleýmettik mazýtty tasmaldaıtyn operatorlar anyqtalyp, baǵasyn bekitken. Qazir tasymaldaý boıynsha tıisti jumystar júrgizilip jatyr. Jalpy aımaqta 34 jylý energetıka kesheni jáne 1622 avtonomdy qazandyq bar.

Aıta keteıik, budan buryn Kentaý qalasynyń turǵyndaryna qazan aıynyń 15-nen bastap jylý berile bastaıtyndyǵyn jazǵan bolatynbyz. Sebebi JEO-daǵy jóndeýden ótken qazandyqtar sol sátte iske qosylyp, tekserýden ótpek.