Túrkistan oblysyna 600 myń tonnadan astam kómir qajet

TÚRKІSTAN. KAZINFORM - Aldaǵy jylytý maýsymyna kómir qory ázirlenip jatyr.

Túrkistan oblysynda 2025-2026 jyldardaǵy jylytý maýsymyna daıyndyq aıasynda kómir qory jasaqtalý ústinde. Aımaqtyń qatty otynǵa degen jalpy qajettiligi 606 myń tonnadan asady.

Jalpy mamyr-shilde aılarynda óńirge 96 791 tonna kómir jetkizý josparlanǵan. Onyń ishinde 76 728 tonnasy temirjol arqyly jetkizilip, jospardyń 79 paıyzy oryndaldy. Búginde óńirdiń 28 kásipkerlik sýbektisiniń qoımalarynda shamamen 100 myń tonna qatty otyn saqtaýly. Kómir tasymaly kún saıyn jalǵasyp jatyr.

Erekshe nazar bıýdjettik mekemelerge — mektepterge, aýrýhanalarǵa jáne áleýmettik nysandarǵa aýdarylyp keledi. Bul uıymdardyń jalpy qajettiligi 75 786 tonna kómir dep eseptelgen.

Qazirgi tańda onyń 36 paıyzy satyp alynǵan. Bıýdjettik mekemeler kómir otynymen 10 tamyzǵa deıin qamtamasyz etilýi tıis.

— Jylytý maýsymynda óńirde kómir tapshylyǵy bolmaýy kerek. Aýdan jáne qala ákimderine bıýdjettik mekemelerdiń qamtamasyz etilýin jáne daıyndyq barysyn qatań baqylaýdy tapsyrdyq. Jylytý maýsymyna daıyndyq turaqty baqylaýda, — dedi oblys ákimdigi ókilderi.

Sonymen qatar, jumystyń ashyqtyǵy men júıeliligin arttyrý úshin kómir jetkizý ındıkatory engizildi. Bul júıe kómir tıeý qarqynyn naqty ýaqyt rejıminde baqylaýǵa múmkindik beredi.

Aıta keteıik, budan buryn Qyzylorda oblysyndaǵy jylýmen qamtý nysandaryn jańǵyrtý úshin bıyl 13,5 mlrd teńge bólingenin jazǵan bolatynbyz.