Túrkistan oblysyna 45-46 gradýs shyjyǵan ystyq kele jatyr
TÚRKІSTAN. KAZINFORM — Túrkistan oblysynda kún raıy 46 gradýsqa deıin kóterilýi múmkin. Bul týraly «Qazgıdromet» RMK Túrkistan oblysy boıynsha fılıaly málimdedi.
Sınoptıkter 27-30 maýsym kúnderi kúndiz Túrkistan oblysynda óte qatty ystyq bolatyny jóninde aqparat taratty.
Óńirdiń ońtústik aımaqtarynda aýa temperatýrasy 45-46 gradýsqa deıin joǵarylaýy yqtımal.
«Negizgi ystyq 27 maýsym kúni tirkeledi dep otyrmyz. Al odan soń kún raıy 41-43 gradýs aralyǵynda bolady. Asa qajet bolmasa túski mezgilde kóshege shyqpaý qajet nemese kúnnen qorǵanatyn zattardy ózińizben birge alyp júrýlerińizdi suraımyz. Taýly aımaqtarda ótkinshi jańbyr sirkireýi múmkin», — deıdi Qazgıdromet mamandary.
Al, dárigerler ystyq kúnderi kóbirek sý ishý kerek degen keńes beredi. Sondaı-aq, kún astynda kóp júrmeý kerektigin eskertedi.
Eger teriniń qyzarýy, qyzba, júrek aıný, entigý, qurysýlar jáne talyp qalý sekildi belgiler baıqalsa, birden jedel járdem shaqyrý qajet.
Oblystyq tótenshe jaǵdaı departamenti kúnniń qatty ysýyna baılanysty órt qaýiptiliginiń 5-shi sanaty engiziletindigin habarlady.
«Qazirgi tańda Túrkistan oblysy aýmaǵyndaǵy órt qaýipti kezeńge daıyndyq jumystary pysyqtaldy. Tehnıka men jeke quram daıyndyqqa keltirildi. Sonymen qatar, orman sharýashylyǵy, polıtsııa qyzmeti, tótenshe jaǵdaı, jergilikti atqarýshy organ ókilderinen mobıldi toptar qurylyp, reıd júrgizip jatyr. Órt qaýipsizdigi erejerlerin qatań saqtaýdy suranamyz» — dedi Túrkistan oblysy TJD memlekettik órt baqylaý basqarmasynyń bas mamany Dýlat Aryn.
