Túrkistan oblysyna 23 mektep qajet
Túrkistan oblysynda apat aldyndaǵy, úsh aýysymdy jáne ǵımaraty yńǵaılastyrylǵan bilim ordalarynyń máselesin sheshý úshin 23 mektep salý kerek. Atalǵan másele Túrkistan oblysy ákimi apparatynyń aptalyq otyrysynda keńinen talqylandy, dep habarlaıdy Kazinform.
Túrkistan oblysy ákiminiń orynbasary Beısen Tájibaevtyń aıtýynsha, bıyl jobalyq qýattylyǵy 6230 oqýshyny qamtıtyn 35 jekemenshik mektep paıdalanýǵa berilgen. Oblysta 33 mekteptiń qurylysy júrgizilip jatyr. «Jaıly mektep» jobasy sheńberinde 2023-2025 jyldary oblysta 63 mekteptiń qurylysy júrgiziledi. Al 2024-2026 jyldary oblysta 6512 oryn tapshylyǵyn joıý, apat aldyndaǵy, sonymen birge úsh aýysymdy jáne ǵımaraty yńǵaılastyrylǵan mektepterdiń máselesin sheshý úshin 13 aýdan, qalada 23 mektep salý kerek.
Qazirgi ózińde 4 kásipker Arys qalasy men Báıdibek, Keles, Saryaǵash aýdandarynda mektep salýǵa usynys bildirgen.
Jıynda densaýlyq saqtaý salasyna ınvestorlar tartý máselesi de qaraldy. Oblystyq densaýlyq saqtaý basqarmasynyń basshysy Ashan Baıdývalıev óńirde 73 medıtsınalyq nysannyń qurylysyn júrgizýge jeke kásipkerlerdi tartý josparlanyp otyrǵanyn jetkizdi.
Jıynda oblys ákimi Darhan Satybaldy ınvestorlar esebinen salynatyn mektepterdi tek tapshy aımaqtarǵa ornalastyrý kerektigin aıtty.
«Jaıly mektep» jobasy arqyly salynatyn bilim uıalarynyń mańyna jekemenshik mektepterdi salýdyń máni joq. Eger bilim uıasy jetkilikti aımaqqa salynsa, ol mektepke oqýshy tabý qıynǵa soǵady. Jaýapty basqarma, aýdan ákimderi osy máseleni tereń zerdelep, birlese jumys atqaryńyzdar. Árbir qurylysty baqylaý, qadaǵalaý kerek. Densaýlyq saqtaý salasynda da nysandar salýǵa ınvestor tartýdy qoldaımyz. Biraq salynatyn medıtsınalyq nysandar bir tıpti jáne baǵasy kóńilge qonymdy bolýy tıis. Tym qymbat qurylysty josparlaý qajet emes», – dedi Darhan Satybaldy.