Túrkistan oblysy Jetisaı aýdanynda sýarý sýyn paıdalaný erejesin buzǵan 65 derek anyqtaldy
ASTANA. KAZINFORM — Vedomstvo basshysy Nurjan Nurjigitov aımaqta jergilikti quqyq qorǵaý organdary basshylarynyń qatysýymen sýdyń «kóleńkeli naryǵymen» kúres máselesine arnalǵan jınalys ótkizdi.
Anyqtalǵan 65 faktiniń 61-i sýarmaly sýdy jetkizýshiniń kelisiminsiz ósirilgen daqyldardy sý kóp qajet etetin daqyldarǵa óz betinshe aýystyrýǵa qatysty. Taǵy 3 jaǵdaıda kúrish alqaptaryn sýarý sý jetkizý týraly kelisimshartsyz júrgizilgen.
Otyrysta Túrkistan oblysyndaǵy sýdy zańsyz alý faktilerin anyqtaý maqsatynda mınıstrlik qurǵan monıtorıngtik toptyń jumysy týraly esep tyńdaldy.
Jıyn qorytyndysy boıynsha sý vedomstvosy men aımaqtyń quqyq qorǵaý organdarynyń basshylary sýdy zańsyz paıdalanýmen kúreste kúsh biriktirýge kelisti. Mınıstr Nurjan Nurjigitov bul qadam Memleket basshysynyń Qazaqstan halqyna Joldaýynda bergen zańdylyqty qamtamasyz etý, tártip ornatý jáne sýdyń «kóleńkeli naryǵyn» túbegeıli joıý jónindegi tapsyrmasyn iske asyrýda mańyzdy ról atqaratynyn atap ótti.
— Memleket basshysynyń sýdyń «kóleńkeli naryǵyn» joıý jónindegi tapsyrmasyn iske asyrý maqsatynda mınıstrlik birqatar shara qabyldady. Sý nysandaryn turaqty baqylaýmen aınalysatyn tórt jumys toby quryldy, sý zańnamasyn buzǵany úshin jaýapkershilik kúsheıtilip, sýarý sýyn paıdalaný erejeleri qabyldandy. Quqyq qorǵaý organdary sýarý sýyn ádil bólý men ony zańsyz paıdalanýǵa qarsy kúreste mańyzdy ról atqarady. Monıtorıngtik toptardyń quramyna quqyq qorǵaý organdary ókilderin qosý olardyń tıimdiligin arttyrady, — dedi Sý resýrstary jáne ırrıgatsııa mınıstri Nurjan Nurjigitov.
Bıyl 10 maýsymnan bastap sýarý sýyn paıdalaný erejeleri kúshine engenin eske sala keteıik. Bul erejelerge sáıkes, kelisimshartsyz sý tutynǵany úshin bekitilgen tarıftiń eki eselengen mólsherinde aıyppul qarastyrylǵan. Al sý berýshiniń kelisiminsiz ósiriletin daqyldardyń túrin ózgertkeni úshin bekitilgen tarıftiń 1,5 eselengen mólsherinde aıyppul salynady.
Sonymen qatar jańa Sý kodeksi de kúshine endi. Qujatqa sáıkes, basseındik ınspektsııalarǵa qadaǵalaý fýnktsııalary berilip, olar jedel áreket etý sharalaryn qabyldaı alady. Sondaı-aq sý salasyndaǵy quqyq buzýshylyqtar úshin jaýapkershilikti kúsheıtýdi kózdeıtin ózgerister Ákimshilik quqyq buzýshylyqtar kodeksine engizildi.
Aıta ketelik Ulttyq sý resýrstary aqparattyq júıesi ázirlenip jatyr.