Túrkistan oblysy turǵyn úı sany boıynsha kósh bastap tur

ASTANA. KAZINFORM – 2025 jyly turǵyn úı qorynyń jalpy alańy 447,3 mln sharshy metr boldy. Bul týraly Ulttyq statıstıka agenttigi habarlady. 

Onyń ishinde qalalyq jerde – 297,9 mln sharshy metr, aýyldyq jerde – 149,3 mln sharshy metr. 2024 jylmen salystyrǵanda turǵyn úı qorynyń alańy 13 mln sharshy metrge ulǵaıdy.

2025 jyly turǵyn úılerdiń jalpy sany 2,6 mln boldy. Onyń 2,3 mln-y jeke turǵyn úıler bolsa, 299,6 myńy – kóppáterli turǵyn úıler (6,2 mln páter).

Turǵyn úılerdiń eń kóp sany Túrkistan jáne Almaty oblystarynda tirkelgen – tıisinshe 339,5 myń jáne 294 myń. Qalalyq jerler arasynda turǵyn úı sany boıynsha Almaty qalasy kósh bastap tur – 164,8 myń. Aýyldyq eldi mekender arasynda eń joǵary kórsetkish Túrkistan oblysynda – 260,9 myń.

2025 jyly bir turǵynǵa shaqqandaǵy turǵyn úımen qamtamasyz etilý kórsetkishi 25,1 sharshy metr. Onyń ishinde qalalyq jerlerde – 27,4 sharshy metr, aýyldyq jerlerde – 21,3 sharshy metr. 2024 jylmen salystyrǵanda bul kórsetkish 0,6 sharshy metrge artty.

Sýmen jabdyqtalǵan turǵyn úı qorynyń úlesi 98%, ortalyq jylytýǵa turǵyn úıdiń 46% qosylǵan, gazy (suıytylǵan jáne tabıǵı qordy qosa alǵanda) bar turǵyn úı qorynyń úlesi 85%.

Aıta ketelik tsıfrlyq qala qurylysy kadastry el boıynsha keńeıtilip jatqany týraly jazǵan edik.